नुवाकोट। ककनी गाउँपालिकाले आफ्नो वडामा घुम्ती शिविर सञ्चालन गरेर सेवा प्रदान गर्दै आएको छ। गाउँपालिकाले सोमबार वडा नं २ कुलेमा घुम्ती शिविरमार्फत स्थानीयलाई सेवा प्रदान गरेको हो। मंगलबार पनि वडा नं ३ मा घुम्ती शिविर सञ्चालन गरिरहेको छ।

गाउँपालिका अध्यक्ष सुमन तामाङको अध्यक्षतामा सञ्चालित शिविरले जनताको घरमा सिंहदरबार भन्ने नारालाई सार्थक पार्ने प्रयत्न गरेको र जनता प्रश्नको उत्तर सहित अन्य सेवा पनि प्रदान गर्ने गरिरहेको छ।

स्थानीय सरकार जनताको घरदैलोको सरकार भएकै कारण जनताका गुनासो जनप्रतिनिधिसम्म पुग्ने र समाधान समेत गर्ने कार्यमा ककनी गाउँपालिकाले अग्रसरता लिएको छ। ककनी गाउँपालिका वडा नं २ का स्थानीयले सोमबार गाउँपालिकाको घुम्ती सेवा अन्तरगत कृषि ,पशु ,स्वास्थ र अन्य सेवा प्राप्त गरेका थिए भने आज (मंगलबार) वडा नं ३का स्थानीयले सेवा लिइरहेका छन्।

सार्वजनिक सुनुवाइबाट जनता गुनासो सुन्दै गाउँपालिकाको दिगो विकास समेत गर्ने टेवा पुग्ने हुदा जनता प्रश्न बाट कुनै पनि जनप्रतिनिधि पछाडि हट्न नहुने गाउँपालिका अध्यक्ष तामाङले घुम्ती शिविरमा बताए।

‘समग्र गाउँपालिकाको विकासमा जनप्रतिनिधिसँगै जनताको पनि महत्त्वपुर्ण भुमिका हुने हुँदा पालिकाबाट विनियोजन बजेट काम गर्ने जनताको टोलटोलमा हुँदा जनस्तर बाट पनि अनुगमन हुनसके मात्र पालिका लक्ष्य पूरा गर्न सकिन्छ,’ उनले भने। समग्र पालिका भित्रका जनताको स्वास्थ्य ,शिक्षा र यातायात क्षेत्रमा परिवर्तन ल्याउन आफूले काम गरेको उनले बताए।

घुम्ती स्वास्थ्य शिविर कार्यक्रममा बोल्दै प्रमुख प्रशासकीय अधिकृत खम्बराज राईले जनताको सेवाको लागि आफू कार्यालयमा उपस्थित भई जनतालाई सेवा दिँदै गरेको अवस्थामा कुनै जनताबाट गुनासो नआएको बताए। उनले यदि कार्यालयमा सेवाग्राही पुग्दा त्यस्तो गुनासोहरु छन् भने सिधा सम्पर्क गर्न आग्रह गरे। उनले अनुगमन पश्चात मात्र भुक्तानी दिने गर्दा राम्रो काम भइरहेको बताए।

उनले भने, ‘कार्यालयमा कर्मचारी समयमै आउन भनेर इलेक्ट्रोनिक हाजिरीको व्यवस्था छ जसले गर्दा जनताको काम समयमै हुने र कर्मचारी समयमै आउने गरेका छन्।’

एकीकृत घुम्ती सेवा अन्तर्गत ककनी गाउँपालिका वडा नम्बर २ का जनताले गाउँपालिकाबाट प्रदान गरिने धेरै सेवा प्राप्त गरेका थिए। स्वास्थ्य शाखा अन्तर्गत सामान्य स्वास्थ्य परीक्षण सुगर, प्रेसर जाँच तथा नेपाल सरकारले उपलब्ध गराउने निःशुल्क औषधि वितरण गरिएको थियो भने पाठेघर र मुखको क्यान्सर परीक्षणको सेवा पनि प्राप्त गरेका थिए।

कृषि शाखा अन्तर्गत बाली उपचार शिविर रोगी बिरुवाको लक्षण पहिचान गर्ने तथा उपचार विधि बारेमा कृषकलाई जानकारी गराउने र उपचारको लागि आवश्यक विषादी निःशुल्क उपलब्ध गराइएको थियो।

पशुसेवा शाखा अन्तर्गत पशुको स्वास्थ्य परीक्षण गोबर परीक्षण, खसी पार्ने आवश्यकता अनुसार औषधि वितरण गर्ने तथा अन्य परामर्श सेवा उपलब्ध गराइएको थियो। यस्तै, उद्योग शाखा अन्तर्गत उद्योग दर्ता गर्ने वाणिज्य फर्म दर्ता नवीकरण खारेजी तथा अन्य परामर्श सेवा प्रदान गरिएको थियो। महिला तथा बालबालिका शाखा अन्तर्गत जेष्ठ नागरिक परिचयपत्र वितरण अपाङ्गता परिचय पत्र वितरण गरिएको थियो।

सामाजिक विकास शाखा अन्तर्गत व्यक्तिगत घटना दर्ता सामाजिक सुरक्षा दर्ता कार्यक्रम सम्पन्न गरिएको थियो। सामान्य सुगर पेसर जाँच र सामान्य स्वास्थ्य सेवा लिएका थिए। पशु सेवा शाखाले गोबर जाँच जाँच्नुका साथै खसी पार्ने विभिन्न पशुपंक्षीको रोग पत्ता लगाई औषधि वितरण समेत गरेको थियो।

कार्यक्रममा ८३ जनाले स्वास्थ्य सेवा लिएका थिए। कृषि विकास शाखाले विषादी वितरण गरेको थियो ग्रामीण भूभाग रहेको ककनी गाउँपालिका वडा नम्बर २ मा अधिकांश किसान रहने भएकाले आवश्यक विषादी वितरण गरिएको थियो। साथै सर्वसाधारणले अन्य सेवा समेत लिएका थिए।

कार्यक्रममा ककनी गाउँपालिका अध्यक्ष तामाङ, प्रमुख प्रशासकीय अधिकृत राई, वरिष्ठ शाखा अधिकृत सुनिल आचार्य, लेखा अधिकृत बिमल आचार्य, ककनी गाउँपालिका वडा नं २ का वडा अध्यक्ष कृष्ण हरि घिमिरे वडा सदस्यहरूसहित ककनी गाउँपालिकाको अन्य कर्मचारी र सेवाग्राहीको उपस्थिति रहेको थियो।