बाजुरा । बाजुराको बडिमालिका नगरपालिकामा रहेको बाउली खोलामा शनिवार मृत अवस्थामा एक परुष फेला परेका छन्। जिल्लाको बडीमालिका नगरपालिका–९ चौराटाका सूर्य विष्ट मृत फेला परेका हुन्।

चौराटाका ४२ वर्षका विष्ट गत तीन दिनदेखि सम्पर्कविहीन थिए। बाउलीको आसपासमा मृत विष्टको जुत्ता र मोबाइल एक दिन पहिला बाउली नजिक फेला परेको थियो।

आज बिहान उनी पनि त्यसै नजिक मृत अवस्था भेटिएको जिल्ला प्रहरी कार्यालय बाजुराका सूचना अधिकारी जनकबहादुर बोहराले बताए। उनले भने, ‘यहाँका स्थानीयले उहाँको शव नेपाल विद्युत प्रविधीकरणको बाजुरा वितरण केन्द्रको पावर हाउस नजिकै बाउली खोलामा भेटिएपछि खबर गरेका थिए। सोही खबर अनुसार हामी त्यहाँ जाँदा विष्ट मृत अवस्थामा भेटिएका हुन्।’

उनको शव पोष्टमार्टमका लागि जिल्ला अस्पताल बाजुरामा राखिएको छ। उनका आफन्तले हत्याको आशङ्का गरेकाले घटना कसले गरेको हो वा आफैँ लडेर खोलामा परेका हुन् भन्ने विषयमा थप अनुसन्धान भइरहेको सूचना अधिकारी बोहराले बताए।