काठमाडौं । अमेरिकी राष्ट्रपति डोनाल्ड ट्रम्पका सहयोगी एलन मस्कले अमेरिका र युरोपबीच ‘शून्य ट्यारिफ’ अवस्था सिर्जना हुने आशा व्यक्त गरेका छन्। जबकि राष्ट्रपति ट्रम्पले भने युरोपमाथि भारी कर लगाइसकेका छन् ।

शनिबार इटालीका उपप्रधानमन्त्री माटेओ साल्भिनीसँगको प्रत्यक्ष छलफलमा मस्कले भने, “मलाई आशा छ कि युरोप र अमेरिका दुवैले शून्य ट्यारिफतर्फ अघि बढ्ने सम्झौता हुनेछ जसले युरोप र अमेरिकाबीच स्वतन्त्र व्यापारको नेतृत्व गर्नेछ।”

उनले भने, “युरोप र उत्तरी अमेरिका बीच यात्रा गर्न मानिसहरूलाई बढी स्वतन्त्रता हुनुपर्छ। यो निश्चित रूपमा राष्ट्रपतिलाई मेरो सल्लाह हो।”

ट्यारिफ बाहेक एलन मस्कले युरोपको ‘दमनकारी’ नीतिहरूको पनि आलोचना गरे। उनले भने ‘यी नीतिहरूले युरोपलाई नयाँ व्यवसाय सुरु गर्न खराब ठाउँ बनाएको छ।’

अप्रिल २ मा, अमेरिकी राष्ट्रपति डोनाल्ड ट्रम्पले विश्वभरका धेरै देशहरूमा पारस्परिक कर लगाए। ट्रम्पको यो कदमको प्रभाव विश्वभरका शेयर बजारमा देखिएको छ। यसबाहेक ट्रम्पविरुद्ध पनि विरोध प्रदर्शन भइरहेको छ।