काठमाडौं । बेंगलुरुका ब्रीडर एस सतीशले संसारकै सबैभन्दा महँगो कुकुर किनेका छन्। यो कुकुरको नाम क्याडाबम ओकामी हो र यो वुल्फडग अर्थान ब्वाँसो र कुकुरको क्रस प्रजाति हो । यसको मूल्य ५० करोड भारतीय रूपैयाँ अर्थात ८० करोड नेपाली रुपैयाँ छ। यो अहिलेसम्मकै सबैभन्दा महँगो कुकुर मानिन्छ।

यो आफ्नो किसिमको पहिलो कुकुर हो जुन जंगली ब्वाँसो र कोकेशियन शेफर्ड प्रजातिको कुकुरको मिश्रित प्रजाति हो। द सनको रिपोर्ट अनुसार ५१ वर्षीय एस सतीशले फेब्रुअरीमा एक दलाल मार्फत यो कुकुर किनेका थिए। संसारकै दुर्लभ कुकुरको रूपमा चिनिने ओकामीको उमेर केवल आठ महिना मात्र छ। यसको तौल ७५ किलोग्राम छ र लम्बाइ ३० इन्च छ।

आफ्नो नयाँ घरपालुवा जनावरको बारेमा द सनसँग कुरा गर्दै सतीशले यो अत्यन्तै दुर्लभ प्रजातिको कुकुर भएको र ठ्याक्कै ब्वाँसो जस्तै देखिने बताए । यो प्रजातिको कुकुर पहिलो पटक बिक्री भएको छ। यो कुकुर अमेरिकामा हुर्काइएको थियो र यो असाधारण छ। उनले भने ‘मैले यो कुकुर किन्न ५० करोड रुपैयाँ खर्च गरें किनभने मलाई कुकुरहरू मन पर्छ र म अनौठो कुकुरहरू हुर्काएर भारत ल्याउन चाहन्छु।’

आफ्नो बल र बाक्लो रौंको लागि परिचित कोकेशियन शेफर्डहरू जर्जिया र रूस जस्ता चिसो क्षेत्रहरूमा पाइन्छन् । तिनीहरू सामान्यतया ब्वाँसाहरू लगायत शिकारी जनावरहरूबाट चौपायालाई जोगाउन प्रयोग गरिन्छ।

प्रसिद्ध कुकुर प्रजनक एस सतीश भारतीय कुकुर प्रजनन संघका प्रमुख हुन्। धेरै वर्षअघि कुकुर पालन गर्न बन्द गरे पनि सतीशले हाल आफ्ना दुर्लभ कुकुरहरूलाई पशु प्रेमीहरूसामु प्रस्तुत गरेर पैसा कमाउँछन्। सतीशका अनुसार उनले ३० मिनेटको कार्यक्रमको लागि २,२०० पाउण्ड र पाँच घण्टाको कार्यक्रमको लागि ९,००० पाउण्ड शुल्क लिन्छन् ।

सतीशले द सनलाई भने, “मैले यो कुकुरमा पैसा खर्च गरें किनभने यो दुर्लभ छ। यसबाहेक यो कुकुरबाट मलाई प्रशस्त पैसा पनि आउँछ । मानिसहरू सधैं यस्ता दुर्लभ कुकुरहरूलाई हेर्न उत्सुक हुन्छन्। उनीहरू सेल्फी र तस्बिर खिच्छन्। फिल्म प्रदर्शनमा मेरो कुकुर र मलाई अभिनेताभन्दा बढी ध्यान दिइन्छ; हामी दुवै जना भीड तान्ने पात्र हौं।”

सतीशसँग एउटा चाउ चाउ पनि छ जुन रातो पाण्डा जस्तै देखिन्छ। सतीशले आफ्नो कुकुर सात एकडको विशाल जग्गामा पाल्छन्। यद्यपि, अन्य कुकुर प्रजातिहरू पनि यो विशाल क्षेत्रमा बस्छन्। आफ्ना घरपालुवा जनावरहरूको सुरक्षाको लागि, उनले आफ्नो सम्पत्ति वरिपरि १० फिट अग्लो पर्खाल र २४/७ सीसीटीभी निगरानी जडान गरेका छन्।