टक्सार (भोजपुर)। मुख्यमन्त्री कप राष्ट्रिय भलिबल प्रतियोगिताको उपाधिका लागि गण्डकी र कोशी प्रदेशबीच भिडन्त हुने भएको छ।

भोजपुर नगरपालिका–७, कोदार रंगशालामा जारी प्रतियोगिताको आज भएको सेमिफाइनल खेलबाट गण्डकी र कोशी प्रदेश फाइनलमा प्रवेश गरेका हुन्। पहिलो सेमिफाइनल खेलमा बागमती प्रदेशलाई ३-० सेटले पराजित गर्दै गण्डकी प्रदेश फाइनल प्रवेश गरेको थियो। खेलको पहिलो, दोस्रो र तेस्रो सेट लगातार २५-२१, २५-१९ र २५-१५ अंकले गण्डकी प्रदेशले बागमतीलाई पराजित गरेको थियो।

आजै भएको दोस्रो सेमिफाइल खेलमा सुदूरपश्चिम प्रदेशलाई ३-२ को सेटमा पराजित गर्दै कोशी प्रदेशले फाइनल यात्रा तय गरेको हो। कोशीले पहिलो, तेस्रो र पाँचौँ सेटमा २५-२१, ३०-२८ र १५-७ ले सुदूरपश्चिमलाई पराजित गरेको हो। दोस्रो र चौथो सेट भने २५-२२ र २५-२३ ले सुदूरपश्चिम प्रदेशले जितेको थियो।

बिहीबार फाइनल खेल हुनेछ भने तेस्रो र चौथोका लागि बागमती र सुदूरपश्चिमबीच प्रतिस्पर्धा हुने आयोजक जिल्ला भलिबल संघले जनाएको छ।

प्रतियोगिताका लागि कोशी प्रदेश खेलकुद विकास बोर्डले रु २० लाख सहयोग गरेको छ। जिल्लाका नौ वटा स्थानीय तहमध्ये आठ स्थानीय तहले प्रतियोगिता सञ्चालन गर्न रु नौ लाख बढी सहयोग गरेका छन्। व्यक्ति तथा संघसंस्थालेसमेत सहयोग गरेको आयोजकले जनाएको छ। प्रतियोगितमा मधेस र कर्णालीबाहेक कोशी, बागमती, गण्डकी, लुम्बिनी र सुदूरपश्चिम पाँच प्रदेशका खेलाडीले सहभागिता जनाएका थिए।

प्रतियोगिताको विजेता तथा उपविजेताले क्रमशः नगद रु तीन लाख, रु एक लाख ७५ हजारका साथमा ट्रफी, मेडल र प्रमाणपत्र पाउनेछन्। त्यसैगरी तेस्रो हुनेले रु ८० हजार तथा चौथो हुने टोलीले रु ४० हजारसहित मेडल र प्रमाणपत्र पाउने आयोजक जिल्ला भलिबल संघका अध्यक्ष विन्द्रकुमार तामाङले जानकारी दिए।

पाँच विधामा विधागत रुपमा उत्कृष्टलाई नगद रु १० हजारका साथमा भोजपुरे खुकुरी प्रदान गरिने र सर्वोत्कृष्ट खेलाडीलाई नगद रु २५ हजार पुरस्कार प्रदान गरिने जनाइएको छ।