काठमाडौं । अमेरिकाको फिलाडेल्फियाकी ३० वर्षीया डेभिन एकेनले आफ्नो जीवन सुधार्न ठूलो निर्णय गरिन्। नोभेम्बर २०२४ मा उनले गराएको ११,००० डलर (१५ लाख रुपैयाँ) को राइनोप्लास्टीले उनको नाकको आकार मात्र परिवर्तन गरेन, उनको आत्मविश्वासलाई पनि नयाँ उचाइमा पुर्‍यायो।

यो शल्यक्रियाले उनलाई आफ्नो “सबैभन्दा ठूलो असुरक्षा” लाई बिदाइ गर्न र सात वर्षको दुखी वैवाहिक जीवनबाट बाहिर निस्कन साहस दियो। डिसेम्बरमा उनको सम्बन्ध विच्छेदको निवेदन स्वीकृत भएपछि एकेन अब नयाँ सुरुवात तर्फ अघि बढिरहेकी छिन्।

“म आफैंमा धेरै सुन्दर महसुस गर्छु,” न्यु योर्क पोस्टका अनुसार एकेनले भनिन् “मेरो नयाँ नाकले मलाई आफैलाई रोज्ने र मेरो दयनीय वैवाहिक जीवन अन्त्य गर्ने शक्ति दियो।”

उनको कथाले मानिसहरूलाई स्तब्ध बनाएको छ र भिडियो टिकटकमा ४५ लाखभन्दा बढी पटक हेरिएको छ। शल्यक्रियापछि उनको आँखामा देखिएको चमक र सम्बन्ध विच्छेदपछि पाएको खुशीले उनलाई नयाँ दृष्टिकोण दियो।

एकेनले भनिन्, ‘म बिहान उठ्छु र धेरै खुसी महसुस गर्छु। मलाई थाहा छ अब म मेरो बाँकी जीवन यसरी नै बिताउन सक्छु।’

एकेनको यात्रा सजिलो थिएन। हाइस्कुलमा उनका सहपाठीहरूले उनको ठूलो नाकको कारण उनको खिल्ली उडाउँथे । यसले उनको आत्मसम्मानमा चोट पुर्‍यायो र उनलाई डिप्रेसनमा धकेलिदियो। उनका अनुसार उनको परिवारमा उनको जस्तो नाक कसैको पनि थिएन, जसले गर्दा उनी अझ एक्लो महसुस गर्थिन्।

कम आत्मविश्वासले उनले २३ वर्षको उमेरमै बिहे गरिन् जुन पछि उनको लागि बोझ बन्यो। गत वर्ष एकेनले फिलाडेल्फियाका प्लास्टिक सर्जन डा. मार्क गिन्सबर्गबाट ​​राइनोप्लास्टी गराउने निर्णय गरिन् । लगभग छ घण्टा लागेको यो प्रक्रियाको खर्च उनी आफैंले बेहोरिन् ।

“यसले मेरो जीवन परिवर्तन गर्यो,” एकेनले भनिन् । शल्यक्रियाबाट निको हुँदासम्मको समयले उनलाई आफ्नो विवाहको बारेमा गहिरो रूपमा सोच्ने अवसर दियो। उनलाई अब सम्बन्ध विच्छेद गर्नुपर्छ र आफ्नो जीवन अगाडि बढाउनुपर्छ भन्ने लाग्यो ।

अब एकेन आफ्नो नयाँ नाक र स्वतन्त्रताका साथ पूर्ण जीवन बिताइरहेकी छिन्। उका अनुसार उनी डेटिङ गरिरहेकी छिन् र धेरै रमाइलो गरिरहेकी छिन् । सामाजिक सञ्जालमा उनका फलोअर्सहरूले उनको लुकलाई बेला हदीद र सेलिन डायन जस्ता सेलिब्रेटीहरूसँग तुलना गरेका छन्।