काठमाडौं । विद्यालय शिक्षा ऐन जारी हुनुपर्ने माग राख्दै नेपाल शिक्षक महासंघले १७ दिन शुक्रबार पनि काठमाडौंमा प्रदर्शन गरेका छन्।

विद्यालय शिक्षा ऐन तत्काल जारी गर्न माग महासंघको नेतृत्वमा शिक्षकहरूले माइतीघर–बानेश्वर क्षेत्रमा प्रदर्शनसहित धर्ना दिएका हुन्।

उनीहरूले संघीय संसदबाट ऐन पारित नभएसम्म आन्दोलन नरोकिने भन्दै नाँचगानका साथै रचनात्मक कार्यक्रम गर्दै प्रदर्शन गरेका हुन्। महासंघले अनुशाासित, मर्यादित र संयमित भएर आन्दोलनमा सहभागी हुन शिक्षकहरूलाई आग्रह गरेको छ।

महासंघले आफूहरूको आन्दोलन निष्कर्षतर्फ उन्मुख भएकाले धैर्य राख्न शिक्षकहरूलाई आग्रह पनि गरेको छ। महासंघले गरेको लगातारको आन्दोलनका कारण बानेश्वर–माइतीघर सडकखण्ड प्रभावित हुँदै आएको छ।

शिक्षक महासंघका अध्यक्ष लक्ष्मीकिशोर सुवेदीले आन्दोलनलाई निर्णायक बनाएरै छोड्ने प्रतिवद्धता जनाउँदै शिक्षकहरूलाई नआत्तिन आग्रह गरेका छन्।