काठमाडौं । गत मंगलबार जम्मू कश्मीरको पहलगामको बैसरनमा ठूलो आतंकवादी हमला भयो । यहाँ आतंककारीहरूले एक पर्यटक समूहलाई निशाना बनाए जसमा २६ जनाको मृत्यु भयो। एक दर्जनभन्दा बढी व्यक्ति घाइते पनि भए। यहाँ मारिएकाहरू र मुस्किलले भागेकाहरूका परिवारका कथाहरू डरलाग्दा छन्।

यी पर्यटकहरूमध्ये केरलाका ११ सदस्यहरूको परिवार पनि कश्मीर घुम्न आएका थिए। तर खाजामा अत्यधिक नुन भएका कारण उनीहरू आक्रमणमा पर्वनाट जोगिए ।

आतंकवादी हमलाको दिन कोच्चिकी निवासी लावण्या र उनको परिवारका अन्य १० सदस्य पहलगाम जाँदै थिए। श्रीनगर पुगेको परिवारले पहलगाम जानुअघि दुई दिन ती ठाउँहरू घुमे । परिवार समूहमा लावण्या, उनका श्रीमान एल्बी जर्ज, उनीहरूका तीन छोराछोरी, उनका सासुससुरा, काकातर्फकी बहिनी र उनको परिवार थिए।

लावण्याले भनिन् – ‘हामीले पहलगामको दुई दिने यात्राको योजना बनाएका थियौं किनभने हामी पहलगामलाई अझ विस्तृत रूपमा हेर्न चाहन्थ्यौं। हामी माथि जाँदै थियौं र त्यहाँबाट केवल दुई किलोमिटर टाढा थियौं। हामी खाजाको लागि एउटा ढाबामा रोकियौं ।

लावन्याका अनुसार ढाबामा उनीहरूका लागि बनाइएको खाजामा नुन चर्को थियो । नुन चर्को भएपछि ढाबाका मालिक र कर्मचारीहरूले उनीहरूका लागि खाजा फेरि बनाइदिने प्रस्ताव गरे । परिवारले आनाकानी गर्दा ढाबा मालिकले फेरि पकाएर खुवाएरै छाड्ने जिद्दी गरे । फेरि पाक्दासम्म पर्खिनुपर्दा उनीहरू पहलगाम पुग्न ढिलो भयो ।

लावण्याले भनिन् ‘हामी दुई जनाप्रति आभारी छौं । ढाबा कर्मचारी जसले हामीले अर्डर गरेको मटन रोगन जोशमा धेरै नुन हाले र त्यसपछि हाम्रो लागि पुन: पकाउन अघि सरे । दोस्रो, मेरो श्रीमान जसले भन्नुभयो – आज हामी खाना खाएपछि मात्र अगाडि बढ्नेछौं।’

लावण्यले अगाडि भनिन्- ‘जब हामीले फेरि खाना खान थाल्यौं, हामीले १०-२० वटा घोडाहरू दौडिरहेको देख्यौं। जनावरहरू डराएकाले हामीलाई केही गडबड भएको महसुस भयो। हामीले सुरुमा सोचेका थियौं कि त्यता पहिरो गएको हुन सक्छ तर पछि हामीले बुझ्यौं कि त्यस्तो होइन। हामीले माथि जाने निर्णय गरेका थियौं तर त्यसपछि ओर्लिरहेका केही सवारी साधनहरूले हातको इशाराले नजान भने।’

उनले अगाडि भनिन् – अर्को कसैले हामीलाई सीआरपीएफ र पर्यटकहरू बीच केही झगडा भएको बताएको थियो। हामीले अझै पनि माथि जाने बारेमा सोच्यौं तर अन्ततः योजना त्याग्ने निर्णय गर्यौं। पछि हामी तल गयौं र तस्बिर खिच्यौं किनकि माथि हामीलाई के भइरहेको छ भन्ने ठ्याक्कै थाहा थिएन। जब हामीले एउटी महिला रोइरहेको र सीआरपीएफ आउँदै गरेको देख्यौं, हामीले बुझ्यौं कि केहि गलत छ।

उनले भनिन् ‘त्यसपछि हामीलाई हाम्रा साथीभाइ र परिवारका सदस्यहरूको फोन आउन थाल्यो । उनीहरूले हाम्रो सुरक्षाको बारेमा सोधपुछ गर्न थाले । अनि जब हामीले समाचार देख्यौं, हामीले महसुस गर्यौं कि हामी कति ठूलो समस्याबाट बचेका थियौं र हामी कति भाग्यमानी थियौं।’

लावण्याले भनिन्- ‘पर्यटकीय मौसम भएकोले र धेरै भीडभाड भएकोले हामीले पछिल्ला दुई दिनदेखि राम्रोसँग खाना खाएका थिएनौं । त्यो दिन मेरो श्रीमानले हामीलाई ढाबामा रोकिन भन्नुभयो र खाना खान जोड दिनुभयो। हामीले यहाँ अर्डर गरेको मटन रोगन जोशमा धेरै नुन र धेरै हड्डीहरू थिए, जुन हाम्रा ७० वर्षभन्दा माथिका आमाबाबुलाई खान गाह्रो थियो।’

उनले अगाडि भनिन् ‘हामीले ढाबाका कर्मचारीहरूलाई यसबारे बतायौं। उनीहरूलाई धेरै नराम्रो लाग्यो र उनीहरूले फेरि हाम्रो लागि ताजा खाजा बनाउन थाले। हामीले ढिलो हुन्छ त भन्यौं तर उनीहरू सहमत भएनन् र फेरि अर्डर तयार गर्न थाले। उनीहरूले जोड दिएकोमा धन्यवाद । फेरि खाना बनाउँदा भएको ढिलाइले हाम्रो ज्यान बचायो।’ लावण्याको परिवार हाल श्रीनगरमा छ र उनीहरू अप्रिल २५ मा केरला फर्कनेछन्।