काठमाडौं । काठमाडौं महानगरपालिकाकी उपप्रमुख सुनिता डंगोलले नेकपा एमालेले सामाजिक सञ्जालमा भाँडभैलो गरेर स्टन्ट गर्न नसिकाउने बताएकी छन्।

लोकतन्त्र दिवसको अवसरमा बिहीबार भृकुटीमण्डपमा एमालले आयोजना गरेको ‘यूथ सेलिव्रेशन’ कार्यक्रममा बोल्दै डंगोलले यस्तो धारणा राखेकी हुन्।

‘एमालेले युवालाई दश नङ्ग्रा खियाउन सिकाउँछ। त्यस कारण म एमालेमा छु। स्टन्ट गरेर र अरूलाई गाली गरेर देश बन्दैन। देश बनाउने हो भने योजना अनुरूप काम गर्नुपर्छ। योजना बनाउनु पर्छ,’ उनले भनिन्।

त्यसैले युवाहरूलाई राष्ट्र निर्माणमा एकजुट हुनसमेत उनले आग्रह गरेकी छन्। ‘नेपाली युवा सकारात्मक ऊर्जा र राष्ट्रिय भावनाले ओतप्रोत छन्। अब हामी एकजुट हुनुपर्छ। जब जब युवा एकजुट हुन्छन् तब तब असम्भव भनिएका कुरालाई सम्भव बनाउँछन्। सफलता उनीहरूले नै पाउँछन्, जसले कहिल्यै हार मान्दैन,’ उनले भिनन्।

नेपाली युवाले काम गर्न सक्छ भन्ने कुरा आफूले विश्व सामु प्रस्तुत गरेको उनको दाबी छ।