काठमाडौं । मकवानपुर प्रहरीले हेटौंडाबाट अवैध लागूऔषध खैरो हिरोइनसहित तीन जनालाई पक्राउ गरेको छ। त्रिभुवन राजपथअन्तर्गत हेटौंडा १ चौकी टोलबाट अटोमा ल्याइरहेको खैरो हिरोइनसहित तीन जना पक्राउ गरेको मकवानपुर प्रहरीले जनाएको छ।

जिल्ला प्रहरी कार्यालय मकवानपुरका प्रवक्ता डिएसपी श्यामु अर्यालका अनुसार हेटौंडा बजारतर्फ आउँदै गरेको ना १ ह १५२८ नम्बरको अटो चेकजाँच गर्ने क्रममा ७ सय ग्राम ३९० मिलिग्राम खैरो हिरोइन फेला परेको हो।

उनले अटोमा आएका हेटौंडा ११ का २७ वर्षीय सुमन गुरुङ र हेटौंडा १ का २० वर्षीय बुद्धिमान थिङलाई शङ्काको आधारमा जाँच गर्दा उनीहरूको साथबाट प्रहरीले ५ सय मिलिग्राम खैरो हिरोइन फेला परेको जानकारी दिए।

पक्राउ परेका गुरुङ र थिङलाई सोधपुछ गर्दा लागूऔषध हेटौंडा १ लालझाडीका ३२ वर्षीय सुरेश तामाङसँग ल्याएको बताएपछि प्रहरीले तामाङको घरमा छापा मार्दा थप ६ ग्राम ८९० मिलिग्राम खैरो हिरोइन फेला परेको प्रवक्ता अर्यालले बताए। तामाङले खाल्डो खनेर लुकाएको अवस्थामा ६ ग्राम ८९० मिलिग्राम खैरो हिरोइन फेला परेको उनको भनाई छ।

लागूऔषधसहित पक्राउ परेका तीन जनालाई जिल्ला अदालत मकवानपुरबाट म्याद अनुमति लिएर आवश्यक अनुसन्धान प्रक्रिया अघि बढाइएको प्रवक्ता अर्यालले बताए।