काठमाडौं। फ्राइडे रिलिज अन्तर्गत शुक्रबार (आज)देखि दुई नेपाली फिल्मले प्रदर्शन आरम्भ गरेका छन्। ‘माछा माछा’ र ‘माया पिरिम’आजदेखि एकसाथ प्रदर्शनमा आएका हुन्।

यी फिल्मले तिहारयता सुस्ताएको नेपाली फिल्मको व्यापारलाई गति दिने विश्वास गरिएको छ।

‘माछा माछा’ क्राइम कमेडी जनरामा बनेको फिल्म हो। दयाहाङ राई र रामबाबु गुरुङले संयुक्त रुपमा फिल्मको निर्माण गरेका हुन्। सुनिल गुरुङको लेखन तथा निर्देशन रहेको फिल्ममा सौगात मल्ल शीर्ष भूमिकामा छन्। सौगातका साथमा नम्रता श्रेष्ठ, विजय बराल, अनोज पाण्डे, प्रविण खतिवडा, सरिता गिरी, भोलाराज सापकोटा, पुष्कर गुरुङ, माओत्से गुरुङ, कमलमणि नेपाल, ध्रव कोइराला लगायतले फिल्ममा अभिनय गरेका छन्।

फिल्ममा तीन जना गाउँले युवाले शहरिया जीवन स्थापित गर्न गरेको संघर्षको कथालाई रोचक ढंगले प्रस्तुत गरिएको छ।

बुधबार राजधानीमा गरिएको प्रिमियरमा यो फिल्मले सुःखद प्रतिक्रिया पाएको थियो।

‘माछा माछा’को ट्रेलर :

यता ‘माया पिरिम’ लभस्टोरी कमेडी जनरामा बनेको फिल्म हो।

टेक पौरखी राईको निर्देशन रहेको फिल्ममा कोशिश क्षेत्री, किरण चन्द, अनुपमा भण्डारी, अर्जुन गुरुङ्ग, कालु राना, जयनन्द लामा, अरुणा कार्की, विशाल पहाडी, रमन राई लगायतका कलाकारहरुको अभिनय छ। यो फिल्मको एक गीतमा अभिनेता सलोन बस्नेत र मोडल अञ्जली अधिकारीले नृत्य गरेका छन्।

फिल्मको कथा सविन अधिकारीले लेखेका हुन्। उनी फिल्मका निर्माता समेत हुन्। फिल्ममा सविनसंगै प्रविन थापा निर्माताको रुपमा रहेका छन्।

‘माया पिरिम’को ट्रेलर :