काठमाडौं । नेपाली काँग्रेसका पूर्व सांसद रामेश्वर प्रसाद ढुङ्गेलको मंगलबार निधन भएको छ । भक्तपुर क्षेत्र नं. २ बाट २०७० को निर्वाचनमा प्रत्यक्ष निर्वाचित पूर्व सांसद ढुङ्गेलको उपचारको क्रममा त्रिवि शिक्षण अस्पताल महाराजगञ्जमा मंगलबार मृत्यु भएको पारिवारीक स्रोतले जनाएको छ ।

यसैबीच, नेपाली कांग्रेसका सभापति शेरबहादुर देउवाले रामेश्वरप्रसाद ढुंगेलको निधनप्रति गहिरो दुःख व्यक्त गरेका छन् । मंगलबार एक विज्ञप्ति जारी गर्दै सभापति देउवाले पार्टी संगठन र नेपालको लोकतान्त्रिक आन्दोलनहरुमा रहेको उनको सक्रिय भूमिकाको स्मरण गर्दै भावपूर्ण श्रद्धाञ्जली अर्पण गरेका हुन् ।

विज्ञप्तिमा भनिएको छ, ‘उहाँको आत्माको चीर शान्तिको कामना गर्दै सम्पूर्ण शोक सन्तप्त परिवारजनप्रति हार्दिक समवेदना प्रकट गर्नु भएको छ ।’

नेपाली काँग्रेसले उनले नेपालको लोकतान्त्रिक आन्दोलनहरुमा तथा पार्टीको संगठनमा सक्रिय भूमिका निर्वाह गरेको स्मरण गर्दै ढुंगेलको निधनबाट पार्टीलाई अपूरणीय क्षति पुगेको छ जनाएको छ ।