काठमाडौं। सामाजिक संजालमा अहिले ३ वर्षका बच्चा भाइरल भइरहेका छन् । डाइपर लगाएका यी बच्चाले निकै शानदार तरिकाले ब्याटिङ गरिरहेको भिडियो भाइरल भएको छ । यी साना बालकको सुन्दर शट देखेर क्रिकेट क्षेत्रका दिग्गजहरु पनि चकित परेका छन् । यो भिडियो इङल्याण्डका पूर्व ब्याट्सम्यान केभिन पिटरसनले इन्स्टाग्राममा शेयर गरेका हुन् ।

उनले बालकको ब्याटिङको प्रशंशा गर्दै विराट कोहलीलाई ट्याग गरेर के यो बच्चालाई आफ्नो टिममा राख्छौ भनेर सोधेका छन् । कोहलीले पनि यो बच्चाको ब्याटिङ अद्भूत भएको भन्दै यो बच्चा कहाँको हो भनेर सोधेका छन् । दक्षिण अफ्रिकाका दिग्गज अलराउण्डर ज्याक कालिसले पनि ‘सिरियस ट्यालेन्ट जो डाइपरबाट बाहिर निस्किएको छैन’ भनेका छन् ।

३ वर्ष २ महिनाका शेख शाहिद नामका यी बालक पश्चिम बंगालका हुन् । उनी शेख समशेरका छोरा हुन् । शाहिदलाई ब्याटिङको प्रारम्भिक कुरा उनका पिता समशेरले सिकाएका हुन् जो पेशाले नाइ हुन् । शाहिदले धेरै कुरा विराट कोहलीलाई टिभीमा ब्याटिङ गरेको हेरेर सिकेका हुन् ।