काठमाडौं। नेपाली लेगस्पिनर सन्दिप लामिछाने आबद्ध मेलबर्न स्टार्सले लगातार दोस्रो खेलमा पनि जीत हात पारेको छ । यो जीतसँगै स्टार्स २ खेलमा दुवैमा जीत हासिल गर्दै ४ अंकसहित अंक तालिकाको दोस्रो स्थानमा उक्लिएको छ । ३ खेलमा २ जित र २ खेल रद्द भएको सिड्नी थन्डर्स तालिकाको शीर्षमा छ ।

आजको खेलमा स्टार्सले होबार्ट हरिकेन्समाथि ५२ रनको विशाल जीत हात पारेको हो । स्टार्सले दिएको १६४ रनको लक्ष्य पच्छ्याएको हरिकेन्स १६ ओभरमा १११ रनमै अलआउट भएको हो । हरिकेन्सका लागि क्लाइभ रोजले सर्वाधिक ३२ रन बनाए । क्यालेब जेवेलले २५, नथान एलिले १२ र म्याकालिस्टर राइटले १० रन बनाए । स्टार्सका लागि हरिस रउफले ५ विकेट लिए । कप्तान ग्लेन म्याक्सवेलले २, एडम जाम्पाले २ र सन्दिप लामिछानेले १ विकेट लिए ।

आजको खेलमा टस जितेर पहिले ब्याटिङ रोजेको मेलबर्नले निर्धारित २० ओभरमा ४ विकेटको क्षतिमा १६३ रन बनाएको थियो । मेलबर्नका लागि ओपनर मार्कुस स्टोइनिसले नटआउट ८१ रन बनाए । ५४ बलको सामना गरेका उनले ७ चौका र ४ छक्का हाने । अर्का ओपनर निक म्याडिन्सनले ४० रन बनाए । बेन डंकले १९ र हिल्टन कार्टराइटले नटआउट १३ रन बनाए । होबार्टको लागि रिले मेरेडिथले ३ विकेट र काइस अहमदले १ विकेट लिए ।