काठमाडौँ । साविकको गोकर्णेश्वर गाविसकै पहिलो सहकारी पासा ग्वाहाली पुचः वचत तथा ऋण सहकारीले आर्थिक वर्ष २०७५–२०७६ मा रु सात लाख ३३ हजार ५८ मुनाफा हासिल गरेको छ।

सहकारीको १३औँ वार्षिक साधारणसभाका अवसरमा पेस गरिएको वार्षिक प्रतिवेदनमा रु एक करोड १३ लाख २५ हजार १०६ आम्दानी भएको उल्लेख छ।

यसैगरी रु एक करोड पाँच लाख ९२ हजार ४७ खर्च भएको विवरण साधारणसभामा प्रस्तुत गरियो।

सहकारीका अध्यक्ष हरिकृष्ण श्रेष्ठले पेश गरेको प्रतिवेदनमा शेयर पूँजी रु एक करोड ४३ लाख ४३ हजार २०० रहेको उल्लेख छ।

सहकारीको निक्षेप बचत रु पाँच करोड ४९ लाख ६३ हजार १५ छ।

सहकारीले रु पाँच करोड ७५ लाख ३९ हजार ८२८ कर्जा लगानी गरेको अध्यक्ष श्रेष्ठले बताए ।

साधारणसभाको उद्घाटन कार्यक्रममा काठमाडौँ क्षेत्र नं ३ का सांसद कृष्ण राईले सरकारको तीनखम्बे अर्थनीतिअनुसार सहकारी अपरिहार्य अङ्ग भएको बताए ।

देशभर छरिएका ३४ हजार ५०० सहकारीकै कारण आर्थिक रूपान्तरणका साथै स्वरोजगार सम्भव भएको उहाँको भनाइ थियो।

प्रदेशसभा सदस्य रामेश्वर फुयाँलले गाउँ गाउँमा फैलिएका सहकारीले निम्न आय भएका जनताको आय आर्जनमा सहयोग गरेको बताए ।

कार्यक्रममा वरिष्ठ पत्रकार विजय चालिसे, गोकर्णेश्वर नगरपालिका वडा नं ४ का अध्यक्ष श्रीकुमार श्रेष्ठ, नेफ्स्कुनका सञ्चालक न्हुच्छेनारायण श्रेष्ठ, सहकारीका उपाध्यक्ष प्रेमलाल श्रेष्ठ, लेखा समिति संयोजक कृष्णभक्त श्रेष्ठलगायतले निम्न आय भएका मानिसका लागि स्वरोजगारी गर्न सहकारी वरदान सावित भएकामा जोड दिएका थिए ।

सो अवसरमा नेफ्स्कुनका नवनिर्वाचित सञ्चालक सदस्य न्हुच्छेनारायण श्रेष्ठ, सहकारीका उत्कृष्ट बचतकर्ता, उत्कृष्ट ऋणी, उत्कृष्ट बाल बचतकर्ता, उत्कृष्ट शेयरधनी, उत्कृष्ट कर्मचारीलगायतलाई सो अवसरमा सम्मानसमेत गरेको थियो ।