काठमाडौं । काठमाडौँको सोह्रखुट्टे ओरालोमा पानी ट्यांकरले एकैपटक ६ वटा सवारी साधनलाई ठक्कर दिएको छ।

ओरालोमा ब्रेक फेल भएको बा ३ ख ९४५० नम्बरको ट्याङ्करले कार, मोटरसाईकलसहित ६ वटा सवारी साधनलाई ठक्कर दिएको महानगरीय प्रहरी वृत्त सोह्रखुट्टेका प्रहरी सहायक निरीक्षक (असई) बसन्त थापाले डिसी नेपाललाई बताए।

थापाका अनुसार, ट्याङ्करको ठक्करबाट बा५ख २१३ नम्बरको यात्रुवहाक बस, बा२१च ६८३२ नम्बरको कार, बा३च ९६७५ नम्बरको कार, बा१५च ३४८२ नम्बरको कार तथा बा २ ज २१२८ र अर्को नम्बर नखुलेको मोटरसाईलमा सामान्य क्षति पुगेको छ ।

ट्याङ्करले गाडीलाई ठक्कर दिएपछि स्थानीय वीरबहादुर तामाङ र विषयजंग गुरूङको घरमा ठोक्किएर रोकिएको थियो । ट्याङ्करको ठक्करबाट घरमा भने सामान्य क्षति पुगेको छ ।

घटनालगत्तै ट्याङ्कर चालक फरार भएपनि ट्याङ्कर धनी भने प्रहरीकहाँ आईपुगेको र फरार चालकको पनि खोजिकार्य जारी रहेको असई थापाले जानकरी दिए ।