काठमाडौं। प्रधानमन्त्री निवास बालुवाटारको ललिता निवासको सरकारी जग्गा व्यक्तिका नाममा सारिएको प्रकरणमा मुछिएका ‘जग्गा दलाल’ शोभकान्त ढकालको नागार्जुन १ नर्सरी चोकस्थित घरमा बम विस्फोट गराएको नेत्र विक्रम चन्द विप्लवले नेतृत्व गरेको प्रतिबन्धित नेकपाले ललिता निवासको जग्गा कब्जामा लिएको घोषणा गरेको छ।

बुधबार साँझ ढकालको घरमा विस्फोट भएको थियो। सो विस्फोटको समेत विप्लव समूहले जिम्मा लिएको छ।

एकीकृत क्रान्तिमार्फत भ्रष्टाचार विरोधी अभियान चलाइएको भन्दै विप्लव समूहले ललिता निवासको ११५ रोपनी जग्गा कब्जा गरेको घोषणा गरेको छ।

समूहले सो सरकारी जग्गा भाटभटेनी सुपर मार्केटका मीनबहादुर गुरुङ, शोभाकान्त ढकाल, रामकुमार सुवेदीले व्यक्तिका नाममा बनाएकाले सो सबै जग्गा बुधबारबाट आफ्नो पार्टी मातहत आउने गरी कब्जा गरेको जनाएको छ।