काठमाडौं। नेपालले भारतसँगको नक्शा विवादबारे वार्ता गर्न भारतसँग कुटनीतिक पहल भइरहेका बेला भारतले भने तत्कालन वार्ताको सम्भावना नरहेको बताएको छ।

नेपालले पटक पटक भारतले हालै जारी गरेको विवादास्पदक नक्शाबारे छलफल गर्न भारतसँग कुटनीतिक पहल भइरहेको बताए पनि भारतले भने त्यस्तो कुनै पहल नभएको बताएको हो।

बिहीबार भारतीय विदेश मन्त्रालयले आयोजना गरेको प्रेस व्रिफिङमा भारतीय विदेशमन्त्रालयका प्रवक्ता रविश कुमारले नेपाल र भारतबीच वार्ताको कुनै मिति तय नभएको जानकारी दिए। पत्रकारको नेपाल र भारतबीच नक्शा विवादमा वार्ताका लागि मिति तय भएको हो? भन्ने प्रश्नको जवाफ दिँदै उनले भने, ‘त्यस्तो कुनै मिति तय भएको छैन। भएपछि भन्छु।’

उनले भारतले नेपालको भूमि नमिचेको आफ्नो पुरानो अडान फेरि दोहोर्याए। उनले भने, ‘नेपालको भूमिबारे मैले पहिला नै भनेको छु, यसमा हामी अडिग छौं।’ भारतीय विदेश मन्त्रालयले यसअघि नै आफूले नेपालको भूमि नमिचेको दावी गरिसकेको छ।

भारतले जारी गरेको नक्शामा नेपालको दार्चुला जिल्लामा पर्ने कालापानी, लिपुलेक र लिम्पियाधुरा समेटिएपछि नेपालमा त्यसको विरोध भइरहेको छ। तर, नेपाल सरकारले हालसम्म आफ्नो आधिकारिक नक्सासमेत जारी गर्न नगरेपछि नेपालमा नेपाल सरकारको आलोचना पनि भइरहेको छ।

Weekly Media Briefing by Official Spokesperson (January 30, 2020) https://t.co/OKrdmEIkPF

— Raveesh Kumar (@MEAIndia) January 30, 2020