काठमाडौं। सोमबार शेयर बाजारमा नेप्से परिसूचक ६ प्रतिशतले घटेपछि सर्किट लागेर बन्द भएको छ।

यो साताको शुरुआतमै अर्थमन्त्री डा. युवराज खतिवडा राष्ट्रिय सभामा नरहने भएपछि अर्थमन्त्रीमा निरन्तरता पाउने समाचार आएपछि शेयर बाजरमा गिरावट देखिएको छ। आइतबार ४० अंकले घटेको नेप्से परिसूचक सोमबार भने झण्डै १ सय अंकले तल झरेको छ। कारोबार शुरु हुँदा १ हजार ५ सय ९१ दशमलव ३६ अंकमा खुलेको नेप्सेमा ९६ अंकले गिरावट आउँदा १ हजार ४ सय ९५ दशमलव ३ अंकमा बन्द भएको छ।

सेन्सेटिभ परिसूचक पनि १९ दशमलव २ अंकले घटेको छ। कारोबार रकम २ अर्ब १५ करोड ४४ लाख २८ हजार २ सय १५ रुपैयाँ बराबरको भएको छ। बजार खुलेको २ घण्टा नहुँदै ५ प्रतिशतले नेप्से घटेपछि ३० मिनेटसम्म सर्किट ब्रेक लागेको थियो।

तर फेरी बजार खुलेको केही समयमै ६ प्रतिशतले गिरावट आउँदा सोमबारका लागि कारोबार पूर्णरुपमा बन्द भएको हो।

बाजरका लगानीकर्ता भने अल्पकालिन लागानीकर्ताले नाफा सुरक्षित गर्न लाग्दा बजार घटेको बताउँछन्। तर्कहिन व्यवहारका कारण बजारमा माथि गएको र अल्पकालमा फाइदा लिन खोज्ने लगानीकर्ताले नाफा सुरक्षित गर्न खोज्दा विक्रीचाप बढी हुन गई नेप्सेमा उच्च गिरावट भएको देखिन्छ।

लगानीकर्ता प्रा. डा. मनोहरकृष्ण श्रेष्ठले बजारमा इ¥याशनल व्यवहार देखिदा बजारमा एकैपटक उच्च गिरावट आएको बताए। यस्तो अवस्थामा नियामक निकायले भूमिका खेल्नु पर्नेमा बजार बढ्यो भनेर बस्ने कारणले पनि लगानीकर्ताको व्यवहारमा परिवर्तन आएको बताए। उनले अर्थमन्त्रीको कारणले भन्दा पनि बजारमा अल्पकालमा फाइदा लिन खोज्ने लगानीकर्ताले नाफा सुरक्षित गर्न खोजेकाले बढी प्रभाव पारेको बताए।

त्यस्तै नेप्सेमा सर्किट ब्रेक हुनेगरी गिरावट आएपछि बजारमा करेक्सन आएको हो वा फेरी घट्दो अवस्थामा जान खोजेको हो भन्ने अन्योलमा लगानीकर्ता परेको देखिन्छ।

त्यस्तै कोरोना भाइरसका कारण चीनसँगको व्यापार गर्न नपाएका व्यवसायीहरुले अलपकालका लागि लगानी गरेको र त्यसको फाइदा सुरक्षित गर्न विक्रीचाप बढाएका कारण पनि नेप्सेमा उच्च गिरावट आएको तर्क लगानीकर्ताहरुको छ।

बाजरमा उच्च गिरावट आउँदा सबैभन्दा बढी असर बीमा र बैंकिङ क्षेत्रमा परेको छ। सोमबार सबैभन्दा बढी निर्जीवन बीमा समूह ७ दशमलव ४६ प्रतिशत र जीवन बीमा समूह ७ दशमलव ४५ प्रतिशतले घटेको छ।

बैंकिङ समूह पनि ६ दशमालव ७४ प्रतिशतले घटेको छ। सबैभन्दा धेरै नेपाल लाइफ इन्स्योरेन्स कम्पनीको १५ करोड ६८ लाख ११ हजार २ सय ५६ रुपैयाँ र एनआईसी एसिया बैंकको १४ करोड ६१ लाख ५२ हजार १ सय ५० रुपैयाँ बराबरको कारोबार भएको छ।

बजार घटेपनि तीन कम्पनीका शेयरधनीहरुले भने सामान्य कमाएका छन्। एनआईसी एसिया ब्यालेन्स फण्ड, खानिखोला हाइड्रोपावर कम्पनी, र श्री इन्भेष्टमेन्ट फाइनान्सका शेयर धनीहरुले कमाएका हुन्।

प्रभु इन्स्योरेन्स, प्रिमियर इन्स्योरेन्स, गरिमा विकास बैंक, आरएसडीसी लघुवित्त, ग्रामिण विकास लघुवित्त, शिखर इन्स्योरेन्स, सुर्या लाईफ, स्ट्याण्डर्ड चार्टर्ड, नेशनल माइक्रो फाइनान्स, नबिल बैंक लागतयका कमपनीको शेयर मूल्य सबैभन्दा धेरै घटेको छ।