काठमाडौं । नेपाली कांग्रेसले कोरोना भाइरसलाई नेपाल प्रवेश र विस्तार हुन नदिनका लागि पूर्व सतर्कताबारे सबैलाई ऐक्यवद्ध हुन आग्रह गरेको छ । पार्टी प्रवक्ता विश्व प्रकास शर्माले सोमबार विज्ञप्ति जारी गर्दै यस्तो अपिल गरेका हुन् ।

विज्ञप्तिमा भनिएको छ, ‘दशा बाजा बजाएर आउन्न भन्ने एक पूरानो कहावत छ । तर प्राणघातक भाइरस कोरोनाले विश्वव्यापी रुपमै महामारीको डँका बजाइरहेको बेला नेपाल देशले सतर्कताको पर्याप्त पूर्व तयारी गर्न सकेन र जोखिमसँग जुध्न चुस्त बन्दोबस्त गरिएन भने त्यसले ठूलो मानवीय क्षति निम्त्याउने खतरा छ ।’

‘अहिलेको गम्भीर विश्व परिस्थितिका बेला सम्पूर्णमा सतर्कताका लागि नेपाली कांग्रेस नेपाल सरकार र सम्बन्धित निकायहरू एवं सबै राजनैतिक दल, संघसंस्था, सञ्चार माध्यम तथा स्वदेश र विदेशमा रहेका समस्त नेपालीमा हार्दिक अपील गर्दछ,’ विज्ञप्तिमा भनिएको छ ।