काठमाडौं। काठमाडौंका लालचन्द्र गौतम तथा उनकी पत्नी वन्दना गौतमले आफ्नो कुलेश्वरस्थित घर क्वारेन्टाइनमा बस्न चाहने नेपाली वा विदेशीका लागि निःशुल्क दिने भएका छन् । उनीसँगै चिराग गोयलले पनि आफ्नो सिफलमा रहेको घर क्वारेन्टाइनमा बस्न चाहनेका लागि दिने भएका छन् । दुवैले फेसबुकमा पोस्ट गर्दै यस्तो जानकारी दिएका हुन् । पौडेलले हिजो बेलुकी तथा गोयलले आज बिहान फेसबुकमा आफ्नो घरको फोटोसहितको पोस्ट गर्दै यसको जानकारी दिएका हुन् ।

गौतमले फेसबुकमा लेखेअनुसार उनी यो घर बेच्ने तयारीमा छन् र यसको मर्मत भइरहेको छ । यो साढे ४ तल्लाको घरमा २ वटा फर्निचरसहितको बेड रुम, २ वटा किचेन, ३ वटा खाली बेडरुम र २ वटा लिभिङ रुम खाली अवस्थामा छन् । नेपाल सरकारले रातारात कोरोना भाइरसको लागि अस्पताल बनाउन नसक्ने भएकोले आफूले सहयोग गर्न चाहेको बताउँदै गौतमले यहाँ क्वारेन्टाइनमा बस्नेहरुको अन्य केही खर्च समेत व्यहोर्न तयार भएको उल्लेख गरेका छन् ।

आज बिहान चिराग गोयलले समेत आफ्नो सिफलस्थित घर क्वारेन्टाइनमा बस्न चाहनेहरुका लागि दिने घोषणा गरेका छन् । उनले आफूले एक विदेशीले काठमाडौंमा आइसोलेसनमा बस्न चाहेको तर यसको लागि होटलको खर्च व्यहोर्न नसक्ने भन्दै सामाजिक संजालमा पोस्ट गरेको देखेपछि यस्तो निर्णय गरेको उल्लेख गरेका छन् । ९ कोठा ३ बाथरुम, २ टेरेस (जसलाई सजिलै कोठामा परिणत गर्न सकिन्छ) तथा पाल भएको खण्डमा ठूलो खाली ठाउँ रहेको यो घर पूरै खाली भएको उनले बताएका छन् । उनले यदि कसैले यो घर क्वारेन्टाइन वा आइसोलेसनको लागि प्रयोग गर्न चाहेमा प्रयोग गर्न सक्ने बताएका छन् ।