काठमाडौं। चीनको वुहानबाट सुरु भएको कोरोना भाइरस (कोभिड–१९) ले १९५ देशलाई आफ्नो चपेटामा लिएको छ। अहिलेसम्म पाँच लाख २५ हजार भन्दा धेरै मानिस संक्रमित भएका छन्। २४ हजार ६५ जनाको मृत्यु भइसकेको छ। एक लाख २३ हजार भन्दा धेरै संक्रमित ठिक भएर घर फर्किएका छन्।

कोरोना भाइरसका कारण अमेरिकामा ठूलो संख्यामा मानिसहरु बेरोजगार भएका छन्। अमेरिकाको श्रम विभागका अनुसार ३३ लाख मानिसले बेरोगारका रुपमा आफ्नो रजिस्ट्रेशन गराएका छन्। अमेरिकी इतिहासमा बेरोजगारी दलको यो सबैभन्दा ठूलो तथ्यांक हो।

अमेरिकामा ८२ हजार १ सय ७९ जना संक्रमित भएका छन्। यो तथ्यांक चीन भन्दा पनि धेरै हो। अमेरिकामा कोरोना भाइरस संक्रमितको संख्या बढिरहेको छ। यहाँ एक दिनमा १५० जनाको मृत्यु भएको छ भने करिव १४ हजार नयाँ केस देखिएका छन्।

अमेरिकामा अहिलेसम्म १ हजार १ सय ७७ जनाको मृत्यु भइसकेको छ। अमेरिकामा न्युयोर्क कोरोना भाइरसको इपीसेन्टर बनेको छ। न्युयोर्कमा अहिलेसम्म २ सय ८१ जनाको मृत्यु भइसकेको छ भने २१ हजार ८ सय ७३ संक्रमित भएका छन्।

उता टर्कीमा बिहीबार कोरोना भाइरसका कारण १६ मृत्यु भएको छ। टर्कीमा अहिलेसम्म ७५ जनाको मृत्यु भइसकेको छ। टर्कीमा संक्रमितको संख्या ३ हजार ६ सय २९ पुगेको छ।

उता चीन सरकारले शनिबार (मार्च २८) देखि अन्य मुलुकसँगको आफ्नो सीमा बन्द गर्ने भएको छ। कोरोना भाइरस फैलिनबाट रोक्न चीनले यो कदम उठाएको हो।

गत वर्ष डिसेम्बरमा चीनका वुहान सहरबाट कोरोना भाइरस फैलिएको थियो। सीमा बन्द कहिलेसम्म हुन्छ भन्ने कुनै स्पष्ट छैन। चीनमा अहिलेसम्म ३ हजार २ सय ८७ जनाको मृत्यु भइसकेको छ भने ८१ हजार २ सय ८५ जना संक्रमित भएका छन्।

देश         संक्रमित संख्या

अमेरिका- ८५२६८
चीन- ८१२८५
इटाली- ८०५८९
स्पेन- ५७७८६
जर्मनी- ४३९३८
इरान- २९४०६
फ्रान्स- २९१५५
स्वीटजरल्यान्ड- ११८११
बेलायत- ११६५८
दक्षिण कोरिया- ९२४१
नेदरल्यान्ड- ७४३१