विष्ट डोटी । सुदूरपश्चिममा कोरोना भाइरसको सङ्क्रमणका बिरामीको सङ्ख्या बढेपछि तथा भारतबाट आएका नागरिक पनि बढी भएकाले उनीहरुको स्वाब सङ्कलनका लागि विशेषज्ञ डाक्टरसहितको टोली जिल्ला आइपुगेको छ।

टोलीले जिल्लाको बोगटान फुड्सिल गाउँपालिकाको खत्याडीबाट काम थालेको छ। खत्याडीमा स्वाब सङ्कलनपछि जिल्लाका अन्य स्थानका कवारेन्टाइनमा रहेका नागरिकको स्वाब सङ्कलनको कार्य शुरु गरिने भएको छ।

उक्त गाउँपालिकामा सबैभन्दा बढी भारतबाट काम गरी आएका नागरिक क्वारेन्टाइनमा भएका कारण पहिलो चरणमा त्यहाँ स्वाब सङ्कलन शुरु गरिएको हो।

भारत तथा अन्य मुलुकबाट काम गरेर गृहजिल्ला आएर क्वारेन्टाइनमा बसेकाहरुको स्वाब सङ्कलनका लागि आएका विशेषज्ञ डाक्टरहरुमा नेपाली सेना, सशस्त्र प्रहरी र निजामतीसहितका चिकित्सकको घुम्ती टोली रहेको जिल्ला प्रशासन कार्यालय डोटीले जनाएको छ।

सङ्घीय सरकारले उक्त टोलीलाई स्वाव सङ्कलनका लागि डोटी पठाउने निर्णय गरेसँगै उक्त टोली जिल्ला आएको हो।

टोलीले जिल्लाका १२ वटै ठाउँका क्वारेन्टाइलमा पुगेर त्यहाँ राखिएका नागरिकहरुको स्वाब सङ्कलन गरी परीक्षणका लागि काठमाडौँ लैजाने प्रमुख जिल्ला अधिकारी टेकनारायण पौडेलले बताए। स्वाब परीक्षणका लागि आएको उक्त टोलीलाई जिल्लाका पाँच ठाउँमा स्वाब सङ्कलनका लागि लैजाने तयारी भएको प्रजिअ पौडेलले जानकारी दिए।

स्वाव सङ्कलनका लागि टोली यहाँका सबै क्वारेन्टाइन जाने भएपछि अहिले सम्पूर्ण क्वारेन्टाइन स्थलमा हेलिप्याड निर्माण भइरहेको जिल्ला प्रहरी कार्यालय डोटीका प्रमुख तथा प्रहरी उपरीक्षक दिलीपसिंह देउवाले बताए।

उनले भने, “स्वाव सङ्कलनका लागि टोली गाउँमा जाने भएकाले सुरक्षाकर्मी खटाएर क्वारेन्टाइन भएका ठाउँमा हेलिप्याड बनाउने काम शुरु भएको छ, स्वाब सङ्कलन कार्यजारी छ।” टोलीले एक दिनमा २०० जनासम्मको स्वाब सङ्कलन गर्ने लक्ष्य लिएको बताइएको छ।

डोटीमा हाल लकडाउनपछि भारतबाट आएका ३०५ जना र सोभन्दा अघि आएका ३१ जना गरी जम्मा ३३६ लाई क्वारेन्टाइनमा राखिएको छ। अहिलेका लागि जिल्ला प्रशासन कार्यालयले जिल्लाका पाँच ठाउँमा स्वाब सङ्कलन केन्द्र राखेको छ।

जिल्लाका नौ स्थानीय तहमध्ये केआइसिंह गाउँपालिका र दिपायल सिलगढी नगरपालिकाका लागि राजपुर, बोगटान फुडसिल गाउँपालिकाका लागि खत्याडी, जोरायल र बडिकेदार गाउँपालिकाका लागि बिपीनगर, आदर्श र सायल गाउँपालिकाका लागि मौवा र शिखर नगरपालिकाका लागि धुर्कोटमा स्वाब परीक्षण सङ्कलन केन्द्र तोकिएको जिल्ला प्रशासन कार्यालय डोटीले जनाएको छ।

त्यसैगरी जिल्ला प्रशासन कार्यालयले कोरोना सङ्क्रमणको संवेदनशीलतालाई मध्यनजर गर्दै क्वारेन्टाइनमा बसेकाहरुको समयावधि थप गरेको छ। यसअघि भारतलगायत अन्य मुलुकबाट आएकाहरुलाई १४ दिनका लागि क्वारेन्टाइनमा राखिएको थियो।

यो अवधि सरकारको निर्णयअनुसार एक हप्ता अरु थप गरिएको छ। प्रमुख जिल्ला अधिकारी पौडेलले क्वारेन्टाइनमा राखिएकाहरुलाई थप एक हप्ता गरी २१ दिन अनिवार्य क्वारेन्टाइनमा राख्न सम्बन्धित पालिकाहरुलाई पत्राचार गरिसकेको बताए।

उनका अनुसार कैलालीमा छोटो अवधिमा खासै लक्षण नदेखिएकाले यहाँका क्वारेन्टाइनमा बसेकाहरुका लागि २१ दिन क्वारेन्टाइनमा राख्ने निर्णय भएको हो। सुदूरपश्चिम प्रदेश सरकारका मुख्यमन्त्री त्रिलोचन भट्टले केही दिनपहिले क्वारेन्टाइनको समयावधि एक हप्ता थप गरी २१ दिन पु-याउन सबै स्थानीय तहलाई आग्रह गरेका थिए। रासस