काठमाडौँ । पछिल्लो केही समयदेखि कोरोना भाइरस (कोभिड १९) को केन्द्रविन्दू बनेको संयुक्त राज्य अमेरिकामा पछिल्लो २४ घण्टामा ज्यान गुमाउनेको संख्या झण्डै आधा घटेको छ ।

अमेरिकामा पछिल्लो २४ घण्टामा जम्मा १ हजार १५७ संक्रमितको ज्यान गएको हो । अघिल्लो दिन शनिबार (नेपाली समयअनुसार) अमेरिकामा २ हजार ६५ जनाको ज्यान गएको थियो । यो अघिल्लो दिनको तुलनामा करिब आधाले कमी हो ।

यस्तै, आइतबार अमेरिकामा २६ हजार ५०९ जना नयाँ संक्रमित थपिएका छन् । अघिल्लो दिन अमेरिकामा ३५ हजार ४१९ जना संक्रमित थपिएका थिए ।

विश्वमै सबैभन्दा धेरै मानिस संक्रमित भएको अमेरिकमा हालसम्म ९ लाख ८७ हजार १६० जना संक्रमित भएका छन् । जसमध्ये ५५ हजार ४१३ संक्रमितको ज्यान गइसकेको छ ।

संक्रमितमध्ये १ लाख १८ हजार ७८१ संक्रमित उपचारपछि घर फर्किसकेका छन् ।