काठमाडौँ । वीर गणेशमान दोस्रो स्मृति कप खुला फुटसल प्रतियोगिता हुने भएको छ।

नेपाल तरुण दल काठमाडौँ महानगरपालिका–२६ ले युवालाई खेलप्रति आकर्षण गर्ने उद्देश्यले विसं २०४६ को जनआन्दोलनका कमाण्डर गणेशमान सिंंहको स्मृतिमा उक्त प्रतियोगिता आयोजना गर्न लागिएको छ।

प्रतियोगिताबारे जानकारी दिन आज आयोजित पत्रकार सम्मेलनमा तरुण दल–२६ का अध्यक्ष कृष्णबहादुर तामाङले शुक्रबारदेखि मनाङ फुटसल क्लब सामाखुशीमा उक्त प्रतियोगिताको आयोजना गर्न लागेको जानकारी दिए।

प्रतियोगिता असोज २३ गतेसम्म चल्ने तामाङले बताए। सम्मेलनमा तरुण दल २६ वडाका सचिव मनिष डङ्गोलले युवापुस्ता फुटसल खेलप्रति आकर्षित हुँदै गएकाले आफूहरुले पनि उक्त प्रतियोगिता गर्न लागेको जानकारी दिए।

उनले उक्त खेललाई रनिङ सिल्डका रूपमा विकास गर्दै लैजाने उद्देश्य रहेको बताए। खेलको प्रथम विजेतालाई दुई लाख, द्वितीयलाई रु एक लाख, तृतीयलाई रु ३० हजार र चौथोलाई रु २० हजार पुरस्कार प्रदान गरिने आयोजकले जनाएको छ।

उक्त प्रतियोगितामा काठमाडौँ उपत्यकाका २५ भन्दा बढी क्लबको सहभागिता रहनेछ।