काठमाडौं। आगामी फागुनमा १४ औं महाधिवेशन गर्नेगरी महाधिवेशनको तयारीमा होमिएको काँग्रेसलाई कोरोना महामारीले संकटमा धकेल्यो। कोरोना महामारीका कारण केन्द्रीय महाधिवेशन अघि गर्नुपर्ने कामहरु हुन सकेका छैनन्। त्यसैले महाधिवेशन नै सार्नु पर्ने होकी भन्ने आशंका बढिरहेका बेला काँग्रेसमा महाधिवेशनको मिति भने नसार्ने गरी अन्य प्रक्रिया छोट्याउने तयारी भएको छ।

आइतबार बसेको काँग्रेस पदाधिकारी बैठकमा महाधिवेशनको मिति नसारेर अरु प्रक्रियाबारे सोच्ने प्रस्ताव आएको काँग्रेस सहमहामन्त्री डा. प्रकाशसरण मतले जानकारी दिए। उनले डिसी नेपालसँग भने, ‘हामी महाधिवेशन सार्ने पक्षमा छैनौं, छलफल पनि त्यसरी नै अगाडि बढेको छ। एउटा प्रस्ताव आएको छ।’

उनले क्रियाशील सदस्यता वितरण र स्थानीय तहको अधिवेशनबारे भने केही प्रक्रिया परिवर्तन हुने बताए। उनले आगामी केन्द्रीय कार्यसमिति बैठकबाट नयाँ कार्यतालिका आउने बताए।

कोरोना भाइरसको महामारी नभएको भए यति बेला काँग्रेसले क्रियाशील सदस्याताको विषय टुंगो लगाइसकेको हुने थियो। तर, कोरोना भाइरस महामारीका कारण क्रियाशील सदस्यता नविकरण र वितरण हुन सकेको छैन।