काठमाडौं । बिहिबार उपत्यकामा ३७७ सहित देशभर एक हजार १११ जना कोरोनाका संक्रमित थपिएका छन्। स्वास्थ्य तथा जनसंख्या मन्त्रालयका प्रवक्ता डा। जागेश्वर गौतमले नियमित पत्रकार सम्मेलनमार्फत कोरोनाका १ हजार १११ संक्रमित थपिएको जानकारी दिए।

प्रवक्ता डा। गौतमका अनुसार काठमाडौं जिल्लामा २७० जना, भक्तपुरमा ४१ जना र ललितपुरमा ६६ जना गरी काठमाडौं उपत्यकामा थप ३७७ जनामा कोरोना संक्रमण पुष्टि भएको हो। नेपालभर कोरोनाबाट संक्रमित हुनेको संख्या ३५ हजार ५२९ पुगेको छ।

हालसम्म २० हजार ७३ जना डिस्चार्ज भएका छन् भने गत २४ घण्टामा ५६९ जना डिस्चार्ज भएको स्वास्थ्य तथा जनसंख्या मन्त्रालयले जनाएको छ। नेपालमा हालसम्म सक्रिय संक्रमितको संख्या १५ हजार २७३ रहेको छ।

मन्त्रालयका अनुसार गत २४ घण्टामा थप ८ जनाको मृत्यु भएको छ भने मृत्यु हुनेको संख्या १८३ पुगेको छ। गत २४ घण्टामा १२ हजार ६२९ जनाको पीसीआर विधिबाट कोरोनाको परीक्षण गरिएको पनि मन्त्रालयले जनाएको छ। यस्तै ९ हजार ४८८ जना क्वारेन्टिनमा रहेका छन्।