काठमाडौं। प्याकेटमा पाइने खाद्यबस्तुको गुणस्तरमा पाइलैपिच्छे समस्या देखिएका छन्। उत्पादन मिति, उपभोग्य मिति, कम्पनी मूल्य र अधिकतम् उपभोक्ता मूल्य, ढुवानी, भण्डारणमा धेरै समस्या देखिएको छ। यसै गरी म्याद सकिन लागेका सामान नष्ट नगरी रिप्याकेजिङ् गर्ने, अनाधिकृत ट्याग राख्नेजस्ता व्यापारिक क्रियाकलाप देखिएका छन्। काठमाडौं महानगरको उपभोक्ता हित संरक्षण समितिको अनुगमनका क्रममा यस्तो पाइएको हो।

‘खाद्यबस्तुको बजारीकरणमा समस्या देखियो। महामारीको मौका छोपेर कतिपय व्यापारीले गलत काम गर्न थालेको हामीले बुझेका छौं।’, महानगरका प्रमुख प्रशासकीय अधिकृत एकनारायण अर्याल भन्छन्, ‘सबै क्षेत्र मिलेर कोरोनाका विरुद्ध लडौं भन्ने हाम्रो आग्रह हो। यसबेला व्यापारीले बजारलाई सहज र सरल बनाउनु पर्छ। यो उहाँहरुको दायित्व हो। यदि कसैले अवस्थाको फाइदा उठाउँछु भनेर सोचेको छ भने हामी कानूनी कारवाहीको प्रक्रियामा जान्छौं। तर, काठमाडौंको अवस्था बिग्रन दिँदैनौं। हामी हरेक दिन बजार अनुगमनमा छौं। यसलाई निरन्तरता दिन्छौं।’

अचार, दाल, भुजिया, गेडागुडी र प्याकेजिङ् खानेकुरा बिक्री गर्ने बालाजु चोक नजिकै रहेको गोपीकृष्ण खाद्य उद्योगका सामानमा समस्यै समस्या थियो। कति सामानहरु म्याद गुज्रिएका थिए। अरुका ब्राण्डका सामानमा आफ्नो ट््याग लगाइएको पनि भेटियो। म्याद सकिएका सामानहरु पुनः प्याकेजिङ् गर्ने तयारी थियो। पानी पुरी, फोँपी (फुराएर खाने) जस्ता सामान ढुसी आएको, ओस र भ¥याङ्मुनि राखिएको थियो।

‘यसरी सामान बेच्नु गलत नै हो। गल्ती स्वीकार गर्दै सञ्चालक गोपिना पराजुलीले भनिन्, ‘अन्यत्रबाट आएका सामानको म्याद ख्याल गर्न नसक्दा यो दिन आयो।’
बुधबार बालाजु औद्योगिक क्षेत्रमा पुग्दा जय गणेश फुड्सको ट््याग उत्पादित चोकर, आँटा र मैदा खाली भुइँमा भण्डारण गरेको पाइएको अनुगमन टोलीले जनाएको छ। उत्पादक काठमाडौं मैदा मिल र बजार प्रबन्धक÷वितरक जय गणेश फुड्स लेखिएको बोरामा वितरकको ट््याग राख्नु गैर कानुनी उपभोक्ता अनुसन्धान मञ्चका अध्यक्ष माधव मिमिल्सेनाले बताए। उनले भने, ‘काठमाडौंभित्रै यस्तो छ। अन्त के होला?’

सटरमा सूचना भित्र बासी खाना

बालाजु औद्योगिक क्षेत्रको ठीक अगाडि न्यु गुप्ता भोजनालय छ। त्यसको आधा खुलेको सटर भित्र मानिसहरु खासखुस गर्दै थिए। अनुगमन टोली भित्र छिरेपछि, त्यहाँ राखिएका सबै खानेकुरा बासी भएको थाहा भयो। पसलमा समोसा, लालमोहन, रसवरी, चमचम, खुर्मा, बर्फीलगायत मिठाइ थिए। ती सामान राखिएको भाँडामा मच्छड, साना कीराहरु र साङ्लाका बच्चा डुवेका थिए। बेच्न राखिएका यी सामानसँग चामल, दाल, तरकारीसँगै राखिएको थियो। बन्द गरिएका डिफ्रिजमा तरकारी, दूध, पानी एकै ठाउँ थियो।

अनुगमनमा क्रममा ५० पिस समोसा, ८ के. जी. को लालमोहनसहितका मिठाइ नष्ट गरिएको थियो। अनुगमनका क्रममा बालाजु चोकमा रहेका मासु पसलको अवस्था पनि निरीक्षण गरिएको थियो।