काठमाडौं । नेपाल प्रहरीमा कार्यरत प्रहरी हवल्दार तथा जवानहरुको खस्कदो मनोबललाई उच्च पार्न प्रहरी प्रधानकार्यालय एक अध्ययन प्रतिवेदन तयार गरेको छ ।

वर्तमान अवस्थामा नेपाल प्रहरीमा देखिएको वितृष्णको कारक तत्व तथा उत्प्रेरणा अभिवृद्धिका क्षेत्रहरु सम्बन्धी अध्ययन प्रतिवेदन गरिएको हो । सो प्रतिवेदन प्रहरी प्रधान कार्यालयमा बिहीबार आयोजित एक कार्यक्रमबीच प्रहरी महानिरीक्षक (आईजीपी) शैलेश थापा क्षेत्रीले सार्वजनिक गरे ।

सो अवसरमा आईजीपी थापाले यस अध्ययन प्रतिवेदनबाट आएका निष्कर्षहरुले आउने दिनमा मातहत कर्मचारीहरुलाई कसरी सम्बोधन गर्ने भन्ने स्पष्ट दिशा प्रदान गरेको बताएका थिए ।

आन्तरिक व्यवस्थापनले मातहत कर्मचारीहरुको मनोबलमा वृद्धि गर्न सकिने अध्ययन प्रतिवेदनबाट देखिएको बताउँदै आईजीपी थापाले प्रतिवेदनबाट आएका निष्कर्षबाट कार्ययोजना तयार पारी त्यसलाई अवलम्बन गर्नुपर्नेमा जोड दिएका थिए । यस सम्बन्धी विगतमा थुप्रै अनुसन्धानका कार्यहरु भएको उल्लेख गर्दै अब बनाईने कार्ययोजना तथा नीतिहरुलाई कार्यान्वयनमा ल्याईने उनले बताए ।