काठमाडौं । अष्ट्रेलियाको घरेलु प्रतियोगिता बिग बास लिग (बीबीएल)मा सन्दीप लामिछाने आबद्ध टिम होबर्ट हुरिकेनसले जित हासिल गरेको छ । शनिबार भएको खेलमा मेलबर्न स्टारविरुद्ध २१ रनको जित निकालेको हो ।

हुरीकेन्सले दिएको १ सय ६५ रनको लक्ष्य पछ्याएको मेलबर्नले २० ओभरमा ९ विकेट गुमाएर १ सय ४३ रन मात्र बनाउन सक्यो । मेलबर्नका लागि ग्लेन म्याक्स्वेलले ७० रनको अर्धशतकीय इनिङ्स खेलेपनि टोलीको हार जोगाउन सकेनन् ।

हुरीकेन्सका स्कोट बोलान्डले ३ विकेट लिए । आजको यो सिजनको पहिलो खेलेका सन्दीपले स्टारविरुद्ध २ विकेट लिए । उनले चार ओभरमा ३८ रन दिएर २ विकेट लिएका हुन् । सन्दीपसँगै नाथन एलिसले पनि २ विकेट लिए ।

यस अघि टस हारेर पहिले ब्याटिङ गरेको हुरीकेन्सले २० ओभरमा ५ विकेट गुमाएर १ सय ६४ रन बनाएको थियो ।उसका लागि डेविड मलानले ७५ रनको अर्धशतकीय इनिङ्स खेल्दा बेन म्याकडेर्मोटले ३१ रन बनाए । कोलिन इन्ग्रामले २६ रन जोडे । मेलबर्नका बिलि स्टानलेकले ३ विकेट लिए ।

मेलबर्नलाई हराएसँगै हुरीकेन्सले ७ खेलमा १८ अंक जोडेको छ । हुरीकेन्स दोस्रो स्थानमा उक्लिएको छ । मेलबर्नले ६ खेलमा ११ अंक जोडेको छ । मेलबर्न पाँचौं स्थानमा रहेको छ ।