काठमाडौं। सत्तारुढ दल नेकपा दुई गुटमा विभाजन भएसँगै एकले अर्को गुटमाथि आक्रोश र आरोपप्रत्यारोप गर्नेक्रम तिब्ररुपमा चलिरहेको छ। पुस ५ यता नेकपा (प्रचण्ड–माधव) समूह र नेकपा (ओली) समूहबीच एकअर्का नेतालाई खुल्याउने क्रम चलिरहेको छ। जुन दिन जुन समूहको कार्यक्रम हुन्छ, त्यसले अर्को समूहमाथि सम्पूर्ण बल लगाएर आरोपप्रत्यारोप गर्छन्।

शनिबार राजधानी काठमाडौंमा नेकपा (ओली) समूहको बृहत कार्यकर्ता भेला थियो। काठमाडौं जिल्ला कमिटीले आयोजना गरेको कार्यक्रममा प्रमुख अतिथि थिए प्रधानमन्त्री तथा पार्टी अध्यक्ष केपी शर्मा ओली। एक घण्टाभन्दा लामो भाषण गरेका उनले धेरै समय प्रचण्ड–माधवको आलोचनामै खर्चिए।

भेलालाई सम्बोधन गर्दै प्रधानमन्त्री ओलीले प्रचण्ड–माधवलाई खिया लागेको नटबोल्ट भएको बताए। उनले भने, ‘खिया लागेका नटबोल्ट खसेपछि अहिले पार्टी द्रुत गतिमा अगाडि बढेको छ। खिया लागेको नटबोल्ट हुँदा गाडी त दुर्घटनामै पर्यो।’ कार्यकर्ताहरुलाई आफूले संसद् विघटन गर्नुको बाध्यता प्रचण्ड–माधव रहेको पुष्टि गर्न उनले पार्टीको गतिविधिदेखि सरकार सञ्चालनमा प्रचण्ड–माधवले सहयोग नगरेको तथ्यहरु देखाए।

उनले भने, ‘म प्रधानमन्त्री भएपछि विश्वलाई आश्चार्य चकित पार्ने गरी आर्थिक वृद्धि दर हासिल भयो। संविधान संशोधन गर्यौं। नक्सा समावेस गरियो। यो कुरा उहाँहरुलाई (प्रचण्ड–माधव) पचेन। भारतका प्रधानमन्त्री आएर समृद्ध नेपाल, सुखी नेपालको राष्ट्रिय आकांक्षमा सहयोग गर्ने कुरा गरे। चिनियाँ राष्ट्रपति आएर त्यो नेपालको राष्ट्रिय आकंक्षालाई सहयोग गर्ने बचन दिए। तर, उनीहरु (प्रचण्ड–माधव)लाई यो विषय कहिल्यै राष्ट्रिय आकांक्षा लागेन। यसको कुरा नै गर्दैनन्। संविधान संशोधन गरेर नक्सा समावेस गरेपछि त उनीहरुलाई पोलेको छ।’

प्रधानमन्त्री ओलीले नेकपाको आधरिकताबारे पनि कार्यकर्ताहरुलाई आस्वस्थ पार्ने प्रयास गरे। उनले भने, ‘यो बरमझिायाको पेडा हो र? असली र नक्कली भन्नु पर्ने ? हामी असली हौं। उनीहरुले निर्वाचन आयोगमा असली हौं भन्दै निवेदन दिनु भएछ। तर असलीले निवेदन दिन आवश्यक छैन।’ उनले अगाडि थपे, ‘जसको गाडी हो, उसले मेरो गाडी हो भनेर निवेदन दिनुपर्छ।’

प्रधानमन्त्री ओलीले प्रचण्ड–माधव समूहभन्दा आफ्नो समूह बलियो हुने पनि दावी गरे। उनले भने, ‘उनहिरुले जति मान्छे जम्मा त, रत्न पार्कमा जुखाम, खाँसीको औषधि बेच्नेले पनि गर्छ।’ प्रचण्ड–माधव समूहले शनिबार नै आन्दोलनका कार्यक्रम घोषणा गरेप्रति पनि उनले टिप्पणी गरे। उनले भने, ‘रत्नपार्कमा उनीहरुले जुखाम खाँसीको औषधि बच्ने जति मान्छे जम्मा गर्दैछन् रे।’