काठमाडौं। क्रिस्टियानो रोनाल्डोले साउदी अरेबियाको पर्यटनको सद्भावना दूत बन्नको लागि आएको वार्षिक ५.३ मिलियन पाउण्ड (८४ करोड रुपैयाँ) बराबरको अफर त्यागेका छन् । तर, साउदी अरेबियाले आफ्नो पर्यटनको अगाडि देखिने अनुहारको रुपमा विश्वस्तरीय फुटबलरलाई ल्याउने आशा त्यागेको छैन । अब साउदीले अर्का स्टार फुटबलर लियोनेल मेस्सीलाई यही अफर दिएको छ ।

द टेलिग्राफका अनुसार यो अफरमा खेलाडी साउदी अरेबिया जाने र साउदीले प्रचारप्रसारको लागि प्रयोग गर्ने सामग्रीहरुमा उनको तस्वीर प्रयोग गरिने शर्तसमेत समावेश छ । तर, ३५ वर्षका युभेन्टस स्टारले भने यो अफर पास गर्ने निर्णय गरेका छन् । साउदी अरेबियाको मानवअधिकार उल्लंघनका रेकर्डको बीचमा उसले विश्वस्तरीय खेलाडीहरुलाई आकर्षित गर्न थालेपछि यस विषयमा चिन्ता बढेको हो ।

फर्मुला वन रेसका मालिकहरुले अर्को वर्षको पेनल्टीमेट रेस साउदी अरेबियामा गर्ने निर्णय गरेपछि उनहिरुको पनि आलोचना भएको छ । एन्थोनी जोसुआ र एन्डी रुइज जुनियरको रिम्याच साउदीमा गर्ने निर्णयप्रति एम्लेस्टी इन्टरनेशनलले आपत्ति जनाएको छ ।