जलेश्वर । महोत्तरीको बलवा नगरपालिका–६ का ५०२ परिवारलाई जग्गाधनी प्रमाण पत्र (लालपुर्जा) वितरण गरिएको छ ।

२०७० सालमा नै नापी भई लालपुर्जा वितरण गर्न नसकिएको ५०२ परिवारलाई आज एक कार्यक्रमबीच लालपुर्जा वितरण गरिएको भूमिसुधार तथा मालपोत कार्यालयका प्रमुख राकेश झाले बताए ।

उनले विगत चार पुस्तादेखि बलवा–६ का सयौँ बासिन्दा आफ्नै गाउँ ब्लकभित्रको जग्गामा बनाइएका घरआँगनमा बस्दै आए पनि उनीहरुसँग आफ्नो घरजग्गाको लालपुर्जा थिएन भने आज उनीहरु लालपुर्जा पाएपछि निकै हर्षित भएको बताए ।

भूमिसुधार तथा मालपोत कार्यालय, नापी कार्यालय र बलवा नगरपालिकाको संयुक्त पहलमा वर्षौंदेखि लालपुर्जाविहीनलाई लालपुर्जा दिइएको बलवा नगरपालिकाका प्रमुख विनोदकुमार यादवले बताए ।

स्थानीयवासी खोदादिन अंसारी, पवीदेवी मण्डल, माधो मण्डलसहित दर्जनौँ व्यक्तिले चार पुस्तापश्चात् आफूहरु आफ्नो घर जग्गाको लालपुर्जा पाएकोमा खुशी व्यक्त गरेका छन् । उनीहरुले लालपुर्जा वितरण गर्न आएका नगरपालिकाका प्रमुख तथा मालपोत र नापी कार्यालयका प्रमुखसहितका टोलीलाई धन्यवाद दिएका थिए । रासस