काठमाण्डौ । पछिल्लो समय अभिनेत्री तनुश्री दत्ताले बलिउड अभिनेता नाना पाटेकरमाथि यौन उत्पीडनको आरोप लगाएपछि बलिउडमा हंगामा नै भएको थियो । जसका कारण नानाले ‘हाउसफूल ४’ छोड्ने निर्णय लिएका थिए ।

फिल्ममा नानाको स्थानमा सुपरहिट फिल्म ‘बाहुबली’का अभिनेता देखिने भएका छन् । भारतीय सञ्चारमाध्यमका अनुसार नानाको स्थानमा ‘बाहुबली’ का भल्लभराज अर्थात अभिनेता राणा दग्गुबतीलाई अनुबन्धिन गरिएको छ ।

चर्चित भारतीय अनलाइन खबर मुम्बई मिररका अनुसार राणा यस फिल्ममा अनुबन्ध समेत भइसकेका छन् । उनले आफू पहिलोपटक यस्तो फिल्ममा काम गर्न पाएकोमा र अक्षय कुमारलगायत स्टारहरुसँग काम गर्न पाएकोमा खुशी व्यक्त गरेका छन् । उनी यस फिल्ममा एक गजल गायकको भूमिका निर्वाह गर्न लागेका छन् ।

साजिदलाई पनि यौन शोषणको आरोप लागेपछि उनी पनि यस फिल्मबाट बाहिरिएका थिए । निर्देशक साजिद खानले निर्देशन गर्ने भनिएको यस फिल्म अब फरहाद सामजीले निर्देशन गर्ने भएका छन् । फरहादले यसअघि ‘हाउसफूल ३’ को निर्देशन गरेका थिए । उनी ‘हाउसफूल’ फ्राचाइजी सीरीजका लेखक पनि हुन् ।

यस फिल्मको सुटिङ केही समयका लागि रोकिएको पनि थियो । तर, साजिद खान र नाना पाटेकर य फिल्मबाट बाहिरिएपछि सुटिङले निरन्तरता पाएको छ । सन् २०१९ को अक्टोबर २६ लाई प्रदर्शन मिति तय भएको यस फिल्ममा अक्षय र राणा दगुबत्तिका साथमा रितेश देशमुख, कृति सनुन, कृति खरबन्दा, बबी देओल र पूजा हेग्डेलगायत कलाकारको अभिनय रहने छ ।