काठमाडौं । नेपाल र कतारबीचको टी२० सिरिज स्थगित भएको छ । कोरोना महामारीको कारण नेपाली राष्ट्रिय क्रिकेट टिमको कतार भ्रमण स्थगित भएको नेपाल क्रिकेट संघ (क्यान)ले जनाएको छ ।

क्यानले सोमबार सूचना जारी गर्दै नेपाल र कतारबीचको सिरिज स्थगित भएको जानकारी दिएको हो । नेपालले कतारसँग कतार स्पोर्ट्स डेको अवसरमा फेब्रुअरी ९ देखि १२ सम्म द्विपक्षीय टी२० सिरिज खेल्ने तालिका रहेको थियो ।

तर, कोरोनाको महामारी बढेसंगै कतार सरकारले स्पोर्ट्स डे स्थगित गरेपछि नेपालको कतार भ्रमण स्थगित भएको हो । कतार भ्रमणका लागि नेपालले बन्द प्रशिक्षणका लागि १८ सदस्सीय खेलाडी छनोट समेत गरिसकेको थियो । क्यानले सोमबारबाट तयारी समेत गर्ने बताएको थियो ।

सिरिज स्थगित भएसँगै टिमको प्रशिक्षण पनि अर्को सूचना नआएसम्मको लागि स्थगित भएको छ ।