काठमाडौं। एक महिलाले एक युवकसँग १ पटकमा १० मिनेटको दरले ३ पटकको डेटिङमै ४० लाख रुपैयाँ गुमाएकी छिन् । युवकले महिलालाई झुक्याएर यति ठूलो रकम ठगेका हुन् । यी युवक सेनाका भएको बताइएको छ । द सनको रिपोर्टअनुसार ४५ वर्षकी एन्जेला ह्वाइटब्रेड नामकी महिलाले नथान वाकर नामका ती युवकलाई डेटिङ एपमा भेटेकी थिइन् । नथानले एन्जेलालाई आफूले लिन लागेको ऋणमा ग्यारेन्टी बसिदिन आग्रह गरेका थिए ।

एन्जेलाका अनुसार त्यतिबेला उनी आफ्ना ७ वर्षसम्मका पार्टनरसँग छुट्टिएर एक्लै थिइन् र उनका साथीहरुले उनलाई नयाँ पार्टनर खोज्न प्रोत्साहित गरिरहेका थिए । यही बीचमा उनले वाकरलाई भेटिन् र उनीहरुको डेट सुरु भएको थियो । ‘हामीले नम्बर साट्यौं र च्याटमा कुराकानी गर्न थाल्यौं’ उनले भनिन् । यही क्रममा वाकरले एन्जेलासँग सहयोग मागे ।

‘उनले आफ्नो फोन लाइनको सम्झौता सकिन लागेकोले लाइन काटिने र आफू म र आफ्नी छोरीसँग कुरा गर्न असमर्थ हुने बताएका थिए’ एन्जेलाले भनिन् । एन्जेलाका अनुसार उनलाई केवल ५० पाउण्ड (८ हजार रुपैयाँ) ऋण भनिएको थियो जुन कारण उनले कुनै खतरा महसुस गरिनन् । ‘मलाई सानैदेखि समस्यामा परेकालाई सहयोग गर्न सिकाइएको थियो र मैले त्यही गरेकी थिएँ’ उनले भनिन् ।

तर, यो सुरुवात मात्र थियो । केही कप्तापछि उनले एन्जेलालाई ग्यारेन्टर बसिदिने सम्बन्धी एउटा लिंक पठाए र एन्जेलाको सहयोग मागे । उनले आफ्नी गर्लफ्रेण्डले आनफूलाई धेरै ऋणमा छाडेर गएको बताए । उनले एन्जेलासँग यो सबै ऋण आफूले तिर्ने बताउँदै सहयोग गरिदिन आग्रह गरे । एन्जेलाले सुरुमा वाकरले आफ्ना परिवारसँग सहयोग मागुन् भन्ने चाहेकी थिइन् तर उनले आफ्नो कुनै परिवार नभएको बताएपछि अन्ततः सहयोग गर्न राजी भइन् ।

वाकरले सुरुमा त ऋणको किस्ता तिर्दै गए तर तीन महिनापछि उनले किस्ता तिर्नै छाडे । एन्जेलाका अनुसार त्यसपछि भने उनले पैसा तिर्न छाडे र त्यो किस्ता एन्जेलाले तिर्नुपर्ने भयो । उनले एन्जेलासँग आफ्नो र छोरीको खर्चका कारण आफूले खर्च धान्न नसक्ने बताएका थिए । वाकर ठगीमा दोषी ठहर त भए तर एन्जेलाले अझै पनि त्यो ऋण तिर्नुपर्ने भयो । जसका लागि उनले अझै ऋण लिनुपर्ने अवस्था पनि आयो ।