काठमाडौं। तुलसीपुरमा ब्राउन सुगरसहित पक्राउ परेकी तुलसा पोखरेललाई अदालतले पुर्पक्षका लागि कारागार चलान गरेको छ। जिल्ला अदालत दाङले ब्राउन सुगरसहित पक्राउ परेकी तुलसीपुर उपमहानगरपालिका वडा नं. ५ निवासी ४२ बर्षीया तुलसा पोखरेललाई पुर्पक्षका लागि कारागार चलान गरेको जिल्ला प्रहरी कार्यालय दाङका एसपी गणेश चन्दले बताए।

अदालतका जिल्ला न्यायाधीश रितेन्द्र थापाको एकल इजलाशले थुनछेक आदेशमा लागुऔषध ब्राउनसुगरको कारोबारमा संलग्न भएको आधार देखिने भन्दै पुर्पक्षकालागि थुनामा पठाएको हो। एसपी चन्दले पक्राउ परेकी पोखरेललाई कारागार पठाइएको बताए। पोखरेलले चलाउने स्कुटरको डिक्की खोल्दा तराजुसहित ब्राउन सुगर गएको फागुन १६ गते प्रहरीले बरामद गरेको थियो।

प्रहरीले तुलसीपुर बजारस्थित पोखरेलको घर अगाडि पार्किङ गरेर राखेको पोखरेलको रा ५ प ७१४६ नम्बरको स्कुटरको डिक्कि भित्र राखेको अवस्थामा प्लाष्टिकसहित तौलगर्दा २.२२ ग्राम ब्राउन सुगर बरामद भएको थियो।

इलाका तुलसीपुर र जिल्ला प्रहरी कार्यालय घोराहीबाट खटिएका साधा पोशाकका प्रहरीले गोप्य सूचनाका आधारमा पोखरेलको स्कुटरमा प्रतिबन्धित लागुऔषध बरामद बरामद गरेपछि पोखरेललाई नियन्त्रणमा लिएको थियो।

पोखरेलका श्रीमान मदन पोखरेल उच्च अदालत सुर्खेतका न्यायाधिश हुन्। थुनामा पठाइएकी पोखरेलले मात्रै कारोवार गर्न सक्ने प्रयाप्त आधार नदेखिएपनि प्रहरीले उनको परिवार र श्रीमानलाई भने अनुसन्धान गर्न छुटाएको छ।

उनले कसको सहायताले कारोवार गर्थिन् भन्ने बारेमा प्रहरी मौन रहेको छ। सुर्खेतमा रहेका श्रीमानलाई पनि प्रहरीले एक पटक पनि सोधपुछ नगरी जिल्ला सरकारी वकिलको कार्यालयमा अनुसन्धानको फाइल पठाएको थियो।