आयुर्वेद चिकित्साबाट पनि उपचार शुरु

डिसी नेपाल
१५ वैशाख २०७८ १८:१०

कास्की । मादी गाउँपालिका–१० थुम्सीकोटमा अवस्थित प्राथमिक स्वास्थ्य केन्द्र(पिएचसी)मा आयुर्वेद औषधालय शाखा स्थापना गरिएको छ । गाउँपालिकासहित लमजुङको उत्तर पश्चिम भेगका नागरिकलाई आधारभूत स्वास्थ्य उपचार सेवा प्रदान गर्दै आएको स्वास्थ्य केन्द्रमा गण्डकी प्रदेश आयुर्वेद औषधालय केन्द्रले शाखा सञ्चालनमा ल्याएको छ ।

सङ्घीय सरकारको जीवनशैली व्यवस्थापन कार्यक्रमअन्तर्गत प्राथमिक स्वास्थ्य केन्द्र रहेका ठाउँमा आयुर्वेद औषधालयको सेवा सञ्चालनको योजनाअनुसार चिकित्सकसहित आयुर्र्वेदको सेवा विस्तार गरिएको प्रदेश आयुर्वेद औषधालय पोखराका प्रमुख कुमार कासुलाले बताए।

उनका अनुसार गाउँपालिका र स्वास्थ्य केन्द्रले उपलब्ध गराएको भौतिक पूर्वाधार संरचनाको प्रयोग गरेर योग, प्राणायाम, ध्यानलगायतका उपचार पद्धतिका माध्यमबाट नसर्ने र दीर्घ रोगको उपचारका लागि विशेष जोड दिइने छ । कासुलाले भने, “नेपालको मौलिक चिकित्सा पद्धतिका रुपमा रहेको आयुर्वेदको ज्ञान वर्षोदेखि नजानिँदो किसिमले पनि पुस्तान्तरण भइरहेको छ, जडिबुटीको प्रयोग हुने आयुुर्वेद औषधीको प्रयोगमार्र्फत ग्रामीण क्षेत्रका जनतालाई स्वास्थ्य सुविधा प्रदान गर्न शाखा सञ्चालनमा ल्याएका हौँ ।”

यसैगरी बाथ रोगका लागि स्नेहन(मालिस) र स्वयदन(बाफले सेक्ने) लगायतका पद्धतिबाट समेत बिरामीको उपचार गरिने शाखा प्रमुख डा दीपक भुसालले बताए । नेपाल सरकारले तोकेका २३ थरीका विभिन्न आयुर्वेद औषधी पनि निःशुल्क विरतण गरिने उनले जानकारी दिए । आयुर्वेद चिकित्सक र एक जना पञ्चकर्म सहायक गरी दुई जनाले सो शाखाबाट बिरामीलाई सेवा प्रदान गर्नेछन् ।

गण्डकी आयुर्वेद औषधालयले यसअघि विसं २०७५ मा माछापुच्छ्रे गाउँपालिका–६ भिँडाबारीमा अवस्थित प्राथमिक स्वास्थ्य केन्द्रमा पनि शाखा सञ्चालमा ल्याएको थियो । आयुर्वेद प्रमुख कसुजाका अनुसार चालू वर्षमा मादी गाउँपालिकाको सिक्लेस, अन्नपूर्ण गाउँपालिकाको नौडाँडा र पोखरा महानगरपालिका–२२ पुम्दीभुम्दीमा गरी तीन वटा नागरिक आरोग्य सेवा केन्द्र स्थापना गरी परामर्श सेवासहित आयुर्वेद औषधी निःशुल्क वितरण गरिएको जनाइएको छ । रासस




प्रतिक्रिया

Leave a Reply

Your email address will not be published. Required fields are marked *