काठमाडौं। नेपाल पर्वतारोहण संघकी द्वितीय उपाध्यक्ष माया शेर्पालाई कोरोना संक्रमण पुष्टि भएको छ। शेर्पालाई आइतबार कोरोना संक्रमण पुष्टि भएको हो।

हाल आफू अस्पतालमा भर्ना भएको र स्वास्थ्य अवस्था सामान्य रहेको शेर्पाले डिसी नेपाललाई बताइन्। अन्नपूर्ण हिमालको सफल आरोहणपछि धौलागिरि आरोहणका लागि बेसक्याम्प पुगेकी शेर्पा क्याम्प १ तर्फ जाने क्रममा उनको स्वास्थ्य बिग्रिएको थियो । स्वास्थ्यमा समस्या र कोरोनाको लक्षण देखिएपछि शनिबार उनलाई उद्धार गरी काठमाडौं ल्याइएको थियो ।

आइतबार कोरोना परीक्षणको रिपोर्ट पोजिटभ आएको उनले आफ्नो फेसबुक मार्फत जानकारी दिएकी छिन् । उनले कोरोना संक्रमण भएकाहरुलाई हिम्मत नहार्न सल्लाह दिँदै सबैको मायाको लागि धन्यवाद दिएकी छिन् । उनले अस्पतालबाट आफ्ना केही तस्वीरहरु पनि सार्वजनिक गरेकी छिन्।

आरोही माया शेर्पा विश्वका ८ हजार मिटरभन्दा अग्ला सबै १४ हिमाल आरोहण गर्ने अभियानमा लागेकी छन्। उनले यस अघि नै सगरमाथा, कंचनजंगा र केटुलगायतका हिमालहरु आरोहण गरिसकेकी छिन्।