काठमाण्डौ । ‘ठग्स अफ हिन्दोस्तान’ को हालत बक्स अफिसमा दयनिय बन्दै गएको छ । बलिउडका ठुला कलाकार : अमिताभ बच्चन, आमिर खान, कटरीना कैफलगायतबाट सजिएको फिल्मले पहिलो दिन जबरजस्त कलेक्सन गरेको थियो । तर, हप्तासम्म आइपुग्दा फिल्मको कलेक्सनमा ठूलो गिरावट आएको छ ।

ट्रेड एनालिस्ट तरण आदर्शले फिल्मकोे कमाईको ताजा आँकडा सार्वजनिक गरेका छन् । पहिलोे दिन ५० करोड ७५ लाख, दोस्रो दिन २८ करोड २५ लाख, तेस्रो दिन २२ करोड ७५, चौथो दिन १७ करोड २५ लाख र पाँचौ दिन फिल्मले जम्मा ५ करोड ५० लाख कमाएको छ ।

फिल्मको कुल कमाई १२४ करोड ५० लाख भारु भएको छ । अन्य भाषाको कमाई जोड्ने हो भने फिल्मले तमिल र तेलुगुमा ४ करोड ५० लाख हात पारेको छ । यो हिसाबले फिल्मले भारतीय बजारबाट कुल १२९ करोड कमाएको छ । फिल्मको लाइफटाइम कलेक्सन १ सय ५० करोडमा सीमित हुने प्रक्षेपण छ ।

२ सय करोडमा निर्माण भएको ‘ठग्स अफ हिन्दोस्तान’ ले घरेलु बजारबाट निर्माताको आधा लगानी उठाउन नसकेपनि ओभरअल कमाईले सुरक्षित भने हुनेछ ।