काठमाण्डौ । कलाकार तथा चलचित्र निर्माता दीपकराज गिरी कान्छा छोरा प्रसिद्ध गिरी र निर्देशक दीपाश्री निरौलाका साथमा अष्ट्रेलियामा छन् । दर्शकसँग प्रत्यक्ष साक्षात्कार गर्नका निम्ति दीपक र दीपासँगै ‘छक्का पञ्जा ३’का केही कलाकार पनि अष्ट्रेलिया आएका हुन् ।

उक्त टोलीमा दीपा, दीपक र प्रसिद्धबाहेक बुद्धि तामाङ, अनुराग कुवँर पनि छन् । अष्ट्रेलियामा सिनेमालाई साथ दिएका दर्शकलाई धन्यवाद दिन र माया बाँड्नका लागि ‘छक्का पञ्जा ३’ को टोली शुक्रबार अष्ट्रेलिया आएको हो । यो टोलीले झण्डै एक साता अष्ट्रेलियामा रहेर दर्शकसँग प्रत्यक्ष साक्षात्कार गरेर फर्किनेछ ।

‘छक्का पञ्जा ३’ अहिले विदेशमा प्रदर्शनरत छ । फूलपातीको दिनदेखि असोज २४ गतेदेखि प्रदर्शनमा आएको यस फिल्मले नेपाली सिनेमाको इतिहासमै सबैभन्दा धेरै कमाउने फिल्मको रेकर्ड बनाएको छ भने अमेरिकामा पनि सर्वाधिक प्रदर्शन हुने नेपाली फिल्म बनेको छ । अमेरिकाका साथसाथै अष्ट्रेलियामा पनि यस फिल्मलाई दर्शकको साथ र माया रहेको छ ।