काठमाडौं। एकीकृत राप्रपा (राष्ट्रवादी) का अध्यक्ष डा. प्रकाशचन्द्र लोहनीले कमल थापा नेतृत्वको राप्रपाका असन्तुष्ट समूह, पशुपति शमशेर जबरा र आफूहरुबीच छिट्टै एकता हुने दाबी गरेका छन् । त्यसकालागि छलफल चलिरहेको उनले जनाए।

आइतबार रिपोर्टर्स क्लबले आयोजना गरेको साक्षात्कारमा बोल्दै अध्यक्ष लोहनीले तीनवटै राप्रपाबीच एकता भयो भने ठूलो शक्ति हुने दाबी गरे। उनले भने, ‘तीनवटै राप्रपाबीच एकताको प्रयास भएको हो। तर, फ्रेमवर्क डकुमेन्ट बनाउन उहाँहरु मान्नुभएन। त्यही भएर एकता भएन। तर, हामी र पशुपतिजीबीच छलफल भैरहेको छ। कमल थापा नेतृत्वको राप्रपाका असन्तुष्ट साथीहरुपनि हामीसँग निरन्तर छलफलमा हुनुहुन्छ। सम्भवतः अब एक साताभित्र एकता हुन्छ।’

उनले कमल थापा नेतृत्वको राप्रपासँगपनि एकताको लागि आफूहरु खुल्ला रहेको सुनाए। उनले भने, ‘राप्रपाका असन्तुष्ट साथीहरुसँगपनि हाम्रो लगातार छलफल भएको छ। हामी सकेसम्म चाँडै एकता गर्छौं।’

फरक प्रसंगमा डा. लोहनीले काठमाडौंमा आइतबार सम्पन्न हुने ‘एशिया प्यासिफिक समिट–२०१८’ को कार्डमा नेपाल सरकारको लोगो रहेको भन्दै आपत्ति जनाए। उनले यो कार्यक्रमको तामझामको लागि कमसेकम दुई करोड खर्च सरकारले गरेको आरोप लगाए।

उनले भने, ‘डेलिगेट्स ल्याउने खर्च आयोजक संस्थाले नै गरेको छ। तर, यसको तामझामको लागि नेपाल सरकारले ठूलो खर्च गरेको छ।’ सरकारले यो विवादित संस्थासँग सहकार्य गर्नुको कारण के हो भन्दै उनले प्रश्न गरे।

डा. लोहनीले भने, ‘नेपालको लागि यो भेलाको उद्देश्य युनिफिकेसन चर्चको अन्तर्राष्ट्रिय बजारमा प्रवर्धन गर्ने र उक्त चर्चका इसाइ पादरीबाट नेपालका ठूलाबडाका दम्पतिसहित आशीर्वाद लिने काममा सीमित रहेको देखिन्छ। युनिफिकेसन चर्चको बजारीकरणमा नेपाल सरकारले दुई करोड़ खर्च गरी हिस्सेदार बनेर हिन्दु र वुद्ध भूमि नेपालको सांस्कृतिक जग बलियो हुन्छ भन्नु अर्थहीन हो।’

दक्षिण कोरियाको युनिफिकेसन चर्चको बजारीरणको लागि नेपालका प्रधानमन्त्रीसहित १५०० दम्पतिलाई चर्चका गुरुबाट आशीर्वाद दिने युनिफिकेसन चर्चको भेलामा नेपाल सरकार संलग्न हुनु दुर्भाग्य रहेको डा. लोहनीको टिप्पणी छ।

उनले प्रधानमन्त्री, मन्त्री तथा नेपाल सरकारका विशिष्ट व्यक्तित्वहरुले आर्शिवाद नै लिनुपर्ने भए नेपालकै लामा गुरु, मनकामनाका पुजारी, पशुपतिनाथका मुल भट्ट र जनकपुरको जानकी मन्दिरका महन्थबाट लिए हुने भन्दै नेपालका अगुवाहरुले यसरी आर्शिवाद लिएकोमा आपत्ति जनाए।

उनले भने, ‘अब उनीहरुपनि त्यही संस्थाको परिवार भए। प्रकारान्तरले यो सम्मेलनले ईशाईलाई बढावा दिएको छ।’ आफू धार्मिक स्वतन्त्रतामा विश्वास गर्ने व्यक्ति भएको सुनाउँदै उनले यो सम्मेलन नेपालको संविधानविपरित पनि रहेको जिकिर गरे। उनले भने, ‘वर्तमान प्रधानमन्त्री ओलीजीले नेपालको संविधानलाई चूनौती दिने काम गर्नुभयो। अमेरिकालगायत अन्य देशमा यो संस्थाले कम्युनिष्टहरुको विरुद्धमा पैसा लगानी गर्दै आएको छ। तर, त्यही संस्थाको पक्षमा यो कम्युनिष्ट सरकार किन उभियो? मलाइ आश्चर्य लागेको छ।’

वर्तमान सरकारसँग स्पष्ट दृष्टिकोण र चिन्तन नदेखिएको उनको गम्भिर आरोप छ। उनले भने, ‘सरकार लहडमा चलेको छ। मन्त्री तथा प्रधानमन्त्रीबाटै यस्तो कार्यक्रमलाई प्रोत्साहन भएको छ। जनताले दिएको विश्वास दुरुपयोग भएको छ।’ सरकारले यो ९ महिनामा भ्रष्टाचार नियन्त्रण गर्न नसकेको पनि उनको अर्को आरोप छ।

उनले भने, ‘प्रधानमन्त्री ओलीले भ्रष्टाचार नियन्त्रण गर्न सक्नुभएन वा उहाँले नियन्त्रण नै गर्न चाहनुभएन। सक्नुभएन भनौं भने दुई तिहाईको बहुमत छ। तर, भ्रष्टाचार व्यापक बढेको छ।’ साँढे ३३ केजी सुन तस्करी प्रकरण कहाँ पुग्यो भनेर उनले प्रश्नसमेत तेर्साए। उनले भने, ‘यही तरिका हो भने अब भ्रष्टाचार नियन्त्रण हुने स्थिति छैन।’