काठमाडाैं ।रोल्पाको कालिपोखरीमा पछिल्लो केही वर्षयता पर्यटकीय चहलपहल बढ्न थालेको छ । पर्यटकीय चहलपहल बढ्न थालेसँगै कालिपोखरी नाइट फायरक्याम्पका रूपमा समेत महत्वपूर्ण गन्तव्य बन्न थालेको छ ।

रात बिताएर आनन्द लिनेहरुको सङ्ख्या बढ्दै जान थालेसँगै यसलाई नाइट फायरक्याम्पका रूपमा लिन थालिएको हो । रोल्पा सदरमुकाम लिवाङवाट चार किलोमिटर दूरीमा रहेको सो स्थानमा शुक्रबार रात बिताएर मनोरञ्जन लिनेहरूको सङ्ख्या बढ्न थालेको हो । हप्ताभर काम गरेर एक दिन आराम लिन चाहने सरकारी कर्मचारी तथा व्यवसायी नाइट फायर क्याम्पका रूपमा कालिपोखरी जान थालेको स्थानीयवासीसमेत रहेका नेपाल पत्रकार महासङ्घ रोल्पाका निवर्तमान अध्यक्ष महेश न्यौपानेले बताए।

हप्ताभरको कोलाहल वातावरणमा काम गर्ने कर्मचारी एक रात एकान्तमा बसेर आराम गर्ने स्थानका रुपमा यसलाई लिन थालेको उनको भनाइ छ । हप्ताभरको कार्यबोझले तनाव भएको मनस्थिति र शरीरलाई आराम दिन आफू नाइट फायर क्याम्पका लागि साथीसँग कालिपोखरी पुगेको होलिभिजन आवासीय मावि लिवाङका शिक्षक सुवास लामिछानेले जानकारी दिए । कालिपोखरीको आनन्दमोहक दृश्य र वातावरणले हप्ताभरको तनाव बिर्साइदिने गरेको उनको भनाइ छ । हप्तामा एक दिन यसरी नाइट फायर क्याम्पमा जाँदा अघिल्लो हप्ताको तनाव बिर्साउनुका साथै आगामी हप्ताको कामका लागि ऊर्जा मिलेको महसुस भएको कालिपोखरी पुगेका अर्का शिक्षक विराट केसीले भने ।

समुद्र सतहदेखि दुई हजार १०० मिटरको उचाइमा रहेको सो स्थानबाट सूर्योदय र सूर्यास्तको मनमोहक दृश्य देखिनुका साथै साविक राप्ती अञ्चलका सबै जिल्ला दृश्यावलोकन गर्न सकिने कालिपोखरी पर्यटन विकास समितिका अध्यक्ष खिमप्रसाद न्यौपानेले बताए । पर्यापर्यटनको दृष्टिकोणले राम्रो सम्भावना बोकेको सो क्षेत्रको विकासका लागि अघिल्लो वर्ष रोल्पा नगरपालिकाले केही बजेटसमेत खर्च गरिसकेको छ । पर्यटकीय क्षेत्रको आधारभूत संरचना निर्माणका लागि रोल्पा नगरपालिका–४ ले केही बजेटसमेत विनियोजन गरेको अध्यक्ष न्यौपानेको भनाइ छ ।