काठमाडौँ । पोखरा, चितवन र लुम्बिनीबीचको पर्यटकीय साझेदारी बढाउने उद्देश्य अनुरुप ‘स्वर्ण त्रिकोण’ को अवधारणका साथ नेपाल पर्यटन बोर्डको आयोजनामा गरिएको प्रवद्र्धनात्मक भ्रमण सम्पन्न भएको छ । पर्यटनको राजधानीका रुपमा विकास गर्न खोजिएको पोखरा, वन तथा वन्यजन्तु, पर्यापर्यटनको आकर्षक गन्तव्य चितवन र सांस्कृतिक पर्यटनको गन्तव्य लुम्बिनीबीच पर्यटकीय साझेदारी बढाउने उद्देश्यले गत शुक्रबारदेखि यी क्षेत्रको चार दिवसीय प्रवद्र्धनात्मक भ्रमण गरिएको थियो ।

नेपाल पर्यटन बोर्ड, पर्यटन सम्बद्ध सङ्घ संस्थाका प्रतिनिधि एवं व्यवसायी र तीनै क्षेत्रका सञ्चारकर्मी सहभागी टोलीले चितवन, लुम्बिनी र पोखराका विभिन्न पर्यटकीयस्थलको अवलेकन गरेको थियो । भ्रमणका क्रममा पोखरामा आयोजित छलफलमा नेपाल पर्यटन बोर्ड गण्डकी प्रदेश कार्यालयका प्रमुख काशीराज भण्डारीले पोखरा, चितवन र लुम्बिनीका आ–आफ्नै पर्यटकीय विशेषता भएको बताउँदै यिनीहरूबीचको साझेदारी बढाउने उद्देश्यले भ्रमण आयोजना गरिएको बताए ।

स्वर्ण त्रिकोणको अवधारणाका साथ प्रवद्र्धनात्मक भ्रमणमार्फत प्रयास थालिएको बताउँदै उनले सबैको साथ र सहयोगमा यी क्षेत्रको पर्यटकीय विकासलाई अघि बढाउन सकिने बताए। पोखरा पर्यटन परिषद्का उपाध्यक्ष पोमनारायण श्रेष्ठले कोरोना प्रभावित पर्यटनको पुनरुत्थानका साथै आन्तरिक पर्यटनको विकासका लागि स्वर्ण त्रिकोणको अवधारणा बहुउपयोगी बन्ने विश्वास व्यक्त गरे । नेपाल एशोसिएशन अफ टुर एण्ड ट्राभल्स एजेन्ट्स(नाट्टा) गण्डकी प्रदेशका प्रथम उपाध्यक्ष हरिराम अधिकारीले पोखरा, चितवन र लुम्बिनीको आ–आफ्नै पर्यटकीय सम्भावना रहेको बताउँदै यिनीहरूबीचको पर्यटकीय साझेदारीका लागि स्वर्ण त्रिकोणको अवधारणा महत्वपूर्ण हुने धारणा राखे ।

यी तिनै स्थानलाई जोड्नका लागि हवाई तथा सडक सञ्जाल प्रभावकारी बन्नुपर्नेमा उनको जोड छ । नेपाल हवाई खेलकूद संस्था(ना) पोखराका अध्यक्ष कृष्ण भण्डारीले स्वर्ण त्रिकोणको अवधारणालाई प्रभावकारी बनाउन सकेमा यसले यस क्षेत्रको आन्तरिक पर्यटन प्रवद्र्धनमा ठूलै टेवा पुग्ने विश्वास व्यक्त गरे।