इटालियन क्लब युभेन्टसका फरवार्ड क्रिस्टियानो रोनाल्डोले हालसालै इटालीको एक चर्चित पत्रिकालाई अन्तर्वार्ता दिएका छन् । त्यसक्रममा रोनाल्डोले विभिन्न विषयमा आफ्ना कुरा राखेका छन् ।

सोही अन्तर्वार्तामा पत्रकारले रोनाल्डोले विगतमा ९ वर्ष बिताएको क्लब रियल मड्रिडबारे पनि सोधेका छन् । रोनाल्डोलाई रियल छाड्नुको कारणबारे सोधिएको प्रश्नमा उनले बडो कूटनीतिक जवाफ दिएका छन् ।

‘म नयाँ कुरा लिन र नयाँ चुनौतीका लागि इटाली आएको हु, अरू कुरा गलत हुन्,’ उनले भनेका छन् ।

त्यसैगरी, रोनाल्डोलाई यदि कुनै बेला रियल मड्रिडविरुद्ध खेल्नु परे के गर्नुहुन्छ भनेर पनि सोधिएको थियो । त्यसमा पनि उनले खुलेर जवाफ दिएका छन् । हिजो म रियलमा थिएँ । त्यहाँ मैले ९ वर्ष बिताएँ । तर, आज यहाँ युभेन्टसमा छु,’ रोनाल्डोले भनेका छन्, ‘विगत भनेको विगत नै हो, म अहिले रियल मड्रिडमा छैन ।’

रोनाल्डोले अघि थपे, ‘यदि कुनै बेला मैले रियल मड्रिडविरुद्ध खेल्नु परे म आफ्नो तर्फबाट सकेको सबथोक दिनेछु । किनभने, म युभेन्टसबाट सबथोक जित्न चाहन्छु ।’