ललितपुर । सीएमजी संकटा क्लब जारी ‘ए’ डिभिजन लिगको उपविजेता बनेको छ । लिगको १२ औं चरणको खेलमा संकटाले थ्री स्टारलाई २–१ ले हराउँदै दोस्रो स्थान पक्का गरेको हो ।

बुधबार ललितपुरको सातदोबाटोस्थित एन्फा कम्प्लेक्समा भएको खेलमा संकटालाई जिताउँन अमित तामाङले निर्णायक दुई गोल गरे भने थ्री स्टारका रन्जन बिष्टले एक गोल गरे । थ्री स्टारले सुरुवाती अग्रता जोगाउन नसकेपछि उपविजेता बन्ने मौका गुमाएको थियो । थ्री स्टारका लागि रञ्जनले खेलको ३० औं मिनेटमा गोल गर्दै सुरुवाती अग्रता दिलाएका थिए । तर, खेलको ४२ औं मिनेटमा अमित तामाङले गोल गर्दै खेल बराबरी बनाए । अमितले पेनाल्टीमार्फत् गोल गरे ।

पहिलो हाफ १–१ को बराबरीमा सकिएको थियो । तर, दोस्रो हाफमा संकटाले पुनः पेनाल्टी पायो । ६३ औं मिनेटमा पाएको सो पेनाल्टीमा पुनः अमितले गोल गरे । र, संकटालाई २–१ को जित दिलाए ।

जितसँगै संकटाले १२ खेलबाट २८ अंक जोड्दै उपविजेता बनेको छ । दोस्रो स्थानमा रहेको उसले तेस्रो स्थानको थ्री स्टारको उपविजेता बन्ने सपना चकनाचुर पारेको छ । थ्री स्टारसँग २३ अंक छ ।