काठमाडौं । गत महिना एसिया कपको उपाधि जितेको श्रीलंकाली क्रिकेट टोलीले बिहीबार नेदरल्यान्ड्सलाई १६ रनले पराजित गर्दै टी–२० विश्वकपको सुपर १२ मा स्थान सुरक्षित गरेको छ ।

नामिबियासँगको पहिलो खेलमा अपसेट खेपेको श्रीलंकाले बाँकी दुई खेलमा जित दर्ता गर्दै सुपर १२ मा प्रवेश गरेको छ ।

टस जितेर पहिले ब्याटिङ गरेको श्रीलंकाले दासुन शनाकाको कप्तानीमा ६ विकेट गुमाएर १६२ रन बनाएको थियो । लक्ष्य पछ्याएको नेदरल्याण्ड्सको टोली २० ओभरमा ९ विकेटको क्षतिमा १४६ रनमा समेटिएको थियो ।

अब नेदरल्यान्ड्सले विश्वकपमा छनोट हुने हो भने युएईले नामिबियासँगको खेल जित्नु आवश्यक छ । विश्वकपको खेलमा श्रीलंका कुन समूहमा परेको छ भन्ने अझै स्पष्ट भइसकेको छैन । यसको निर्णय पनि नामिबिया र युएईबीचको खेलपछि हुनेछ ।