काठमाडौं । अष्ट्रेलियासँग अहमदाबादमा जारी चौथो टेष्ट खेलको नतिजा आउनुअघि नै भारत विश्व टेस्ट च्याम्पियनसिपको फाइनलमा पुगेको छ ।

दुई टेस्टको शृंखलाको पहिलो खेलमा न्यूजिल्याण्डले श्रीलंकालाई दुई विकेटले पराजित गरेको छ । यसपछि भारत अंक तालिकामा अगाडि बढ्दै डब्लुटिसीको फाइनलमा पुगेको छ ।

विश्व टेस्ट च्याम्पियनसिप ७ देखि ११ जुन २०२३ सम्म लन्डनको ओभल मैदानमा खेलिनेछ। अष्ट्रेलियाले इन्दौर टेस्टमा भारतलाई हराएपछि फाइनलमा स्थान पक्का गरेको थियो। अब फाइनलमा भारत र अष्ट्रेलिया आमनेसामने हुनेछन् ।

अहमदाबाद टेस्टको आज पाँचौं दिन हो र चार खेलको यो सिरिजमा भारत २-१ ले अगाडि छ। यदि आज श्रीलंका नहारेको भए भारतलाई यो चौथो खेल जित्न आवश्यक थियो ।