काठमाडौं । आईसीसी विश्व टेस्ट च्याम्पियनसिपको फाइनल खेलअघि भारतीय टोलीलाई ठूलो झट्का लागेको छ । टोलीका स्टार खेलाडी श्रेयस अय्यर करिब ५ महिनादेखि टिम बाहिर छन् । अष्ट्रेलियाविरुद्धको अहमदाबाद टेस्टका क्रममा श्रेयसले कम्मर दुखेको गुनासो गरेका थिए ।

अहिले चिकित्सक टोलीले श्रेयसलाई शल्यक्रिया गर्न सल्लाह दिएको छ । स्रोतका अनुसार श्रेयस अहिले मुम्बईमा चिकित्सकको निगरानीमा छन् । चिकित्सकले तेस्रो चेकअपपछि श्रेयसलाई शल्यक्रिया गर्न सल्लाह दिएका थिए । यसको मतलब अब श्रेयस करिब ५ महिना खेलबाट बाहिर रहनेछन् ।

यस्तो अवस्थामा श्रेयस अय्यर इन्डियन प्रिमियर लिग (आईपीएल) २०२३ सिजनबाट बाहिरिने भएका छन् । साथै, श्रेयस जुन ७ बाट हुने विश्व टेस्ट च्याम्पियनसिपको फाइनल खेलका लागि पनि उपलब्ध हुने छैनन् । यस्तो अवस्थामा भारतीय टोलीका लागि यो ठूलो झट्का हो ।

स्रोतका अनुसार श्रेयस अय्यर लन्डनमा आफ्नो शल्यक्रिया गराउन चाहन्छन् । जबकि शल्यक्रिया गर्ने ठाउँ वा अस्पताल बिसिसिआईले अझै तय गरेको छैन। श्रेयसले अस्ट्रेलियाविरुद्धको चौथो टेस्टमा ब्याटिङ गरेनन् । अहमदाबाद टेस्टमा लगातार दुई दिन फिल्डिङ गरेपछि श्रेयसले आफ्नो तल्लो ढाड सुन्निएको गुनासो गरे। यस अवधिमा उनले एक ओभर बलिङ पनि गरे ।

इन्डियन प्रिमियर लिग (आईपीएल) २०२३ सिजन ३१ मार्चबाट सुरु हुँदैछ। श्रेयस अय्यर आईपीएलमा कोलकाता नाइट राइडर्स (केकेआर) टोलीका कप्तान हुन्। यस्तो अवस्थामा यो टोलीका लागि पनि तनावको विषय हो । अब केकेआरले नयाँ कप्तान खोज्नुपर्छ ।

मिडल अर्डर ब्याट्सम्यान श्रेयस अय्यरको यो चोट बारम्बार उठिरहेको छ । यसअघि सन् २०२२ को डिसेम्बरको बंगलादेश भ्रमणमा पनि श्रेयसले यस्तै समस्या भोग्नुपरेको थियो । त्यसपछि उनी चोटका कारण न्यूजिल्याण्डविरुद्धको एकदिवसीय सिरिजबाट बाहिर हुनुपरेको थियो ।