काठमाडौं । अमेरिकाले अरुणाचल प्रदेशलाई भारतको अभिन्न अंग मान्ने र केही क्षेत्रको नाम परिवर्तन गरेर यस क्षेत्रमा प्रवेश गर्ने कुनै पनि एकपक्षीय प्रयासको कडा विरोध गरेको बताएको छ ।

चीनले अरुणाचल प्रदेशका ११ स्थानको नाम परिवर्तन गरेपछि अमेरिकाको यो प्रतिक्रिया आएको हो । चीनले अरुणाचललाई तिब्बतको दक्षिणी भागको रूपमा वर्णन गर्दछ। चीनको नागरिक मामिला मन्त्रालयले आइतबार यी ११ स्थानको नयाँ नाम सार्वजनिक गरेको हो ।

समाचार एजेन्सी पीटीआईका अनुसार ह्वाइट हाउसका प्रेस सेक्रेटरी केरिन जीन पियरेले मंगलबार पत्रकार सम्मेलनमा भनिन्, “अमेरिकाले अरुणाचल प्रदेशलाई लामो समयदेखि भारतको अभिन्न अंगको रूपमा मान्यता दिएको छ। हामी यहाँका क्षेत्रहरूको नाम परिवर्तन गर्ने कुनै एकपक्षीय प्रयासको विरोध गर्दछौं ।”

“हामी लामो समयदेखि यस स्ट्यान्डमा छौं।” यसअघि मंगलबार भारतले चीनले अरुणाचल क्षेत्रको नाम परिवर्तन गरेको कुरालाई ठाडै अस्वीकार गरेको थियो ।

भारतीय पक्षबाट भनिएको थियो कि अरुणाचल प्रदेश हाम्रो अभिन्न अंग हो र यो सत्य ‘नयाँ नाम’ राखेर परिवर्तन हुँदैन ।

विदेश मन्त्रालयका प्रवक्ता अरिन्दम बागचीले भने, “हामीले त्यस्ता रिपोर्टहरू देखेका छौं। चीनले यस्तो प्रयास गरेको यो पहिलो पटक होइन। हामी यसलाई अस्वीकार गर्छौं।”